Афіцыйны Менск супраць ядзернай зброі :: Хартыя'97 :: Навiны

Намаганні сусветнай супольнасці па нераспаўсюджанні павінны суправаджацца пэўнымі крокамі па ядзерным раззбраенні, а таксама стварэннем і развіццём мераў даверу паміж ядзернымі і неядзернымі дзяржавамі. Пра гэта заявіў кіраўнік беларускай дэлегацыі намеснік міністра замежных спраў Віктар Гайсёнак на пленарным паседжанні 51-ай сесіі Генеральнай канферэнцыі Міжнароднага агенцтва па атамнай энергіі (МАГАТЭ), паведамілі БелТА ў прэс-службе МЗС Беларусі. Па ўсёй верагоднасці, такім чынам афіцыйны Менск адказаў на скандальныя заявы амбасадара Расеі Аляксандра Сурыкава наконт магчымасці размяшчэння ў Беларусі расейскай ядзернай зброі.

Сёння Віктар Гайсёнак паінфармаваў пра пазіцыю Беларусі ў галіне гарантый МАГАТЭ, адзначыўшы, што наша краіна з`яўляецца перакананым і паслядоўным прыхільнікам умацавання і ўніверсалізацыі міжнароднага рэжыму ядзернага нераспаўсюджання і няўхільна выконвае свае абавязальніцтвы па ДНЯЗ і Пагадненні аб ужыванні гарантый. Акрамя таго, Беларусь заклікае іншыя дзяржавы не губляць з вачэй стратэгічную мэту ДНЯЗ – ядзернае раззбраенне.

У сваім выступе намеснік міністра замежных спраў Беларусі падрабязна спыніўся на пытаннях тэхнічнага супрацоўніцтва ў рамках МАГАТЭ. Ён падкрэсліў, што тэхнічнае ўзаемадзеянне з агенцтвам дазваляе нашай краіне атрымліваць істотную дапамогу ў шэрагу галін, звязаных з ужываннем ядзерных ведаў і тэхналогій, і высока ацаніў прафесіяналізм і кампетэнтнасць, з якімі Сакратарыят МАГАТЭ падыходзіць да рэалізацыі праектаў тэхнічнага супрацоўніцтва ў Беларусі.

Адмысловы акцэнт у выступе быў зроблены на пытаннях супрацоўніцтва з МАГАТЭ па пераадоленні наступстваў аварыі на Чарнобыльскай АЭС. У прыватнасці, адзначанае, што ў гэтай галіне агенцтва цягам некалькіх гадоў паспяхова рэалізуе праекты, накіраваныя на мінімізацыю наступстваў чарнобыльскай аварыі і стварэнне перадумоў для адраджэння забруджаных раёнаў на тэрыторыі Беларусі і іншых пацярпелых краін.

Намеснік міністра таксама звярнуў увагу на намаганні Рэспублікі Беларусь, накіраваныя на падтрымку дзейнасці МАГАТЭ у галіне ядзернай і радыяцыйнай бяспекі і захаванасці, а таксама ў сферы развіцця ядзерных навук, тэхналогій і ўжыванняў.

Нагадаем, што ў канцы жніўня ў эксклюзіўным інтэрв`ю "Інтэрфаксу" амбасадар Расеі ў Беларусі Аляксандр Сурыкаў, адказваючы на пытанне, ці будзе Расея размяшчаць на тэрыторыі Беларусі новыя вайсковыя аб`екты ў адказ на размяшчэнне элементаў амерыканскай сістэмы ПРА ў Еўропе, заявіў:

"Гэта залежыць ад узроўню нашай палітычнай інтэграцыі. А таксама ад пунктаў гледжання экспертаў, дыпламатаў, вайскоўцаў: трэба, можна, калі, як. Я маю на ўвазе аб`екты, якія маюць дачыненне да ядзернай зброі".

Такім чынам, сённяшнія заявы прадстаўніка МЗС Беларусі сведчаць пра намер Беларусі выконваць пагадненне па ядзерным раззбраенні і захаваць бяз`ядзерны статус дзяржавы.

Падыходы ўлады і апазіцыі ў гэтым пытанні супадаюць. Як вядома, моладзевыя лідэры Беларусі ў знак пратэсту супраць агрэсіўнай палітыкі Расеі на прэс-канферэнцыі ў Менску парвалі партрэты прэзідэнта Расеі Уладзіміра Пуціна.