Заява руху «За Свабоду» :: Хартыя'97 :: Навiны

Заснавальнікі РПГА “Рух “За свабоду” выступілі з заявай з нагоды адхілення Вярхоўным судом скаргі на рашэнне Міністэрства юстыцыі аб адмове ў дзяржаўнай рэгістрацыі РПГА “Рух “За свабоду”

"Пагадзіўшыся з рашэннем Міністэрства юстыцыі і не зарэгістраваўшы грамадскую арганізацыю ў судовым парадку, Вярхоўны Суд прыняў палітычна матываванае рашэнне. Ён прызнаў некампетэнтныя і юрыдычна нікчэмныя аргументы Міністэрства юстыцыі.

Кожны прадстаўнік улады, які дыктуе такія рашэнні або выконвае іх, павінен ведаць, што ён здзяйсняе злачынства супраць беларускага народу, за якія ён нясе адказнасць. Такія рашэнні адкідваюць Беларусь назад у ейным развіцці, узмацняюць міжнародную ізаляцыю нашай краіны і не дазваляюць ёй плённа супрацоўнічаць з дэмакратычнымі краінамі.

Рух “За Свабоду” будзе звяртацца ў Камітэт ААН па правах чалавека з мэтай яшчэ раз зафіксаваць абуральныя парушэнні свабоды аб’яднанняў, якія ў Беларусі ўжо даўно носяць сістэмны характар.

Мы будзем і надалей патрабаваць дзяржаўнай рэгістрацыі нашага аб’яднання, ў тым ліку дзеля таго, каб паказаць абсурднасць дзеянняў сённяшняй улады, адсутнасць механізмаў прававой дзяржавы ў Беларусі і нежаданне ўладаў паважаць фундаментальныя правы і свабоды чалавека. Сваёй дзейнасцю мы ўвесь час будзем прымушаць уладу апраўдвацца перад беларускай і сусветнай грамадкасцю за свае супрацьпраўныя і рэпрэсіўныя дзеянні."