Прыняць прапановы Эўразвяза – выратаваць незалежнасьць Беларусі :: Хартыя'97 :: Навiны

21 верасня ў Менску адбылася прэс-канферэнцыя лідэраў палітычных партый, прымеркаваная да правядзення 14 кастрычніка Эўрапейскага Маршу. Паводле аднаго з сустаршыняў Палітрады Аб’яднаных дэмакратычных сілаў, лідэра Партыі БНФ Вінцука Вячоркі, Эўрапейскі Маршы – гэта папярэджаньне ўладам перад 2008 годам. “Рэальна сытуацыя абвострыцца ў 2008 годзе, - заявіў Вінцук Вячорка. – Пасьля разбурэньня эканомікі, якое зараз адбываецца, у Беларусь можа прыйсьці нецывілізаваны капітал з Усходу, што ў сваю чаргу ёсьць пагрозаю незалежнасьці Беларусі. На Эўрапейскі Марш мы пойдзем, каб патрабаваць ад уладаў адказу на 12 прапановаў Эўразьвязу. Лічу, што выступіць сёньня за 12 прапановаў ЭЗ – значыць ратаваць незалежнасьць Беларусі”.

“Падчас Эўрапейскага Маршу мы ад Кастрычніцкай плошчы накіруемся да Нацыянальнай бібліятэкі, каб ускласьці кветкі да помніку аднаго з нашых найвыбітнейшых эўрапейскіх беларусаў – Францішка Скарыны”, -- адзначыў Вінцук Вячорка.

“Стратэгія, прынятая Кангрэсам дэмакратычных сілаў, намі выконваецца, мы гатовыя весьці канструктыўную дыскусію пра тое, якія зараз дзейнічаюць мэханізмы яе рэалізацыі”, - заявіў адзін з сустаршыняў Палітычнай Рады АДС Анатоль Лябедзька. У рамках рэалізацыі стратэгіі АДС, паводле Лябедзькі, вядзецца падрыхтоўка да Эўрапейскага і Сацыяльнага маршаў.

Арганізатар Эўрапейскага Маршу, намесьнік старшыні Партыі БНФ Віктар Івашкевіч сказаў, што на Беларусі зараз няма ніводнай палітычнай сілы, якая б не падтрымала правядзеньня Эўрапейскага Маршу. “Нават уладныя структуры пакуль не выступілі супраць”, - заявіў спадар Івашкевіч.

Віктар Івашкевіч таксама паведаміў, што ў адказ на рэпрэсіі, якія ўлады распачалі супраць моладзі напярэдадні Еўрапейскага Маршу, аргкамітэт мае намер звярнуцца да амбасадараў краін Еўразвязу ў Беларусі. Па словах Івашкевіча, неўзабаве можа быць зроблена заява, што рэпрэсіі супраць арганізатараў Еўрапейскага Маршу будуць разглядацца еўрапейскімі краінамі як варожыя крокі ў дачыненьні Еўрапейскага Звязу.