Пасьлявыбарная ракіроўка :: Charter'97 :: News

Аляксандар Лукашэнка сваімі ўказамі зрабіў некалькі гучных адставак і прызначэньняў. У адстаўку адпраўлены нязьменны глава Адміністрацыі прэзыдэнта Міхаіл Мясьніковіч. На ягонае месца прызначаны глава Савету Бясьпекі, нядаўна – міністар замежных справаў Урал Латыпаў. Мясьніковіч прызначаны памочнікам прэзыдэнта па асаблівых даручэньнях. Вядома таксама аб прызначэньні новага главы Савету Бясьпекі – ім стаў зараз ужо экс-глава лукашэнкаўскай Службы Бясьпекі Генадзь Нявыглас.

Лукашэнка зьняў таксама свайго вернага ідэёляга, намесьніка главы адміністрацыі Ўладзімера Замяталіна. Ён “пераведзены на іншую працу”.

Першым намесьнікам Главы Адміністрацыі прызначаны першы намесьнік Дзяржаўнага сакратара Савету Бясьпекі Станіслаў Князеў.

Яшчэ адным намесьнікам Главы Адміністрацыі стаў Анатоль Козік, які да гэтага працаваў Паўнамоцным прадстаўніком прэзыдэнта.

Вядома таксама аб адстаўцы намесьніка Главы Адміністрацыі Юры Сівакова (у мінулым таксама міністра ўнутраных справаў, пры якім у краіне пачаў дзейнічаць “эскадрон сьмерці”).

Пакуль рана казаць аб прычынах перастановак у вярхах улады. Можна толькі дадаць, што па некаторай інфармацыі, Міхаіл Мясьніковіч зьбіраўся йсьці на прэзыдэнцкіх выбарах у якасьці кандыдата. Аднак пасьля таго, як Лукашэнка прыгразіў яму расправаю, Мясьніковіч зьмяніў свае пляны. Магчыма, у гэтым і хаваюцца прычыны адстаўкі Мясьніковіча. Калі так, то ў хуткім часе у адстаўку будзе адпраўлены прэм’ер Ярмошын, які таксама цесна супрацоўнічаў з экс-кандыдатам Марынічам.