Узноўлена крымінальная справа супраць Міхаіла Чыгіра :: Charter'97 :: News

Узноўлена рассьледаваньне справы супраць экс-прэм’ера Беларусі Міхаіла Чыгіра, якога больш за год таму абвінавачвалі ў крадзяжы 1 мільёну даляраў і ў атрыманьні хабару. Сьледчы камітэт пры МУС аднавіў сьледчыя дзеяньні ў справе Міхаіла Чыгіра, хоць, нагадаем, што гарадзкі суд Менску ўжо разглядаў гэтую справу і віны Чыгіра не знайшоў, але палічыў яго віноўным у службовай неахайнасьці і прысудзіў 3 гады ўмоўнага пакараньня. Аднак Вярхоўны суд гэтае пакараньне не падцьвердзіў і накіраваў справу на новае рассьледваньне. З таго часу прайшоў амаль год і сьледчы камітэт чамусьці нічога не рабіў, каб скончыць рассьледаваньне. Аднавілася яна толькі зараз, праз тры дні пасьля прэзыдэнцкіх выбараў.

Чыгіра выклікалі на допыт у сьледчы камітэт, дзе задавалі, як ён сам паведаміў Радыё Свабода, “усё тыя самыя пытаньні”. “Ім загадалі давесьці справу да суда, вось яны яе і даводзяць”, -камэнтуе Міхаіл Чыгір. Між тым, у сьледчым камітэце сцьвярджаюць, што дзейнічаюць выключна па закону і нават спасылаюцца на ліст з пракуратуры, якая патрабавала скончыць новае рассьледаваньне да 27 жніўня. Чаму гэты тэрмін ня вытрымалі, сьледчыя не тлумачаць.