У Менск з трохдзённым візытам прыбыла афіцыйная дэлегацыя зь Лівіі на чале са старшынём Вышэйшага Савету абароны Лівіі Абу Бакрам Юнісам Джабэрам. Прадстаўнікі апазыцыі пратэстуюць супраць візыту і разглядаюць яго як несяброўскі крок беларускіх уладаў адносна ЗША, якія падазраюць, што Лівія падтрымлівае міжнародных тэрарыстаў. Лівійскую дэлегацыю на чале з Юнісам Джабэорам прынялі ў Менску на самым высокім узроўні – іх вітаў Аляксандар Лукашэнка, прэм’ер-міністар Уладзімер Ярмошын, сакратар Савету Бясьпекі Генадзь Нявыглас. Трэба адзначыць, што незалежных журналістаў на гэтыя сустрэчы не акрэдытавалі.

---

Цэнтрвыбаркам прызнаў неабгрунтаванымі скаргі Гэльсынскага камітэту, праваабарончага цэнтру “Вясна” і кандыдата ў прэзыдэнты Ўладзімера Ганчарыка аб непрызнаньні прэзыдэнцкіх выбараў. Такое рашэньне прынята Цэнтрвыбаркамам 14 верасьня на сваім паседжньні. Усе тры скаргі насілі комплексны характар і ахоплівалі ня толькі працэс галасаваньня па выбарах прэзыдэнта Беларусі, але і ўсю выбарчую кампанію ў агуле. Сярод асноўных парушэньняў называюцца незаконнае фармаваньне выбарчых камісіяў, злоўжываньні Лукашэнкам сваім службовым становішчам падчас агітацыі, адсутнасьць роўных умоваў агітацыі для ўсіх кандыдатаў. Заявіцелі прадставілі факты парушэньня выбарчага заканадаўства падчас датэрміновага галасаваньня, перашкоды назіраньню за выбарамі, кантролю падліку галасоў. Усіх гэтых фактаў дастакова для таго, каб прызнаць выбары несапраўднымі, але не для “прыдворнага” ЦВК.

---

Беларусь – ізгой Эўропы, па словах дзяржсакратара ЗША Коліна Паўэлла – “адзіны і апошні прытулак бяззаконства” на кантыненце. Пры Аляксандры Лукашэнку, які практыкуе таталітарызм старой школы, гэтая былая савецкая рэспубліка ўпарта чапляецца за мінулае.

---

Вчера за выражение соболезнования народу Соединенных Штатов в связи с кровавой трагедией, произошедшей 11 сентября, был задержан милиционерами и получил предупреждение просвитер Шарковщинской баптистской церкви Петр Мажейко. Пастор Мажейко проехал по поселку Шарковщина с привязанным к велосипеду американским государственным флагом с траурной лентой, сообщает Радыё Свабода.

---

Па стану на 14 верасьня Міністэрства замежных спрваў Беларусі пакуль ня мае якой-небудзь інфармацыі пра тое, што сярод ахвяраў тэрарыстычных актаў у Нью-Ёрку і Вашынгтоне ёсьць грамадзяне Беларусі. На сёньня вядома, што ніхто з пэрсаналу замежных установаў Беларусі ў ЗША, а таксама членаў іхніх сем’яў у выніку тэрактаў не пацярпеў.

---

У пятніцу ўступіла ў сілу пастанова Міністэрства транспарту і камунікацыяў, якім павышаюцца тарыфы на перавоз пасажыраў легкавымі таксі. Зараз кошт пасадкі ў таксі і аднаго кілёмэтру пераезду ў ёй з 6 да 22 гадзінаў складае 310 рублёў (было 295). У начны час (з 22 да 6 гадзінаў) - 465 рублёў (было 440). Папярэдняе павышэньне тарыфаў на перавоз пасажыраў легкавымі таксі адбылося ў канцы красавіка.

---

З 14 верасьня ў Беларусі павышаюцца кошты на дызельнае паліва й мазуту на 4,7 і 7,7 адсоткі адпаведна. Пра гэта паведамілі БелаПАН ва ўрадзе рэспублікі. Зараз 1 літар дызэльнага паліва на АЗС канцэрну “Белнафтахім” будзе каштаваць 440 рублёў, а тона мазуту – 153 тысячы рублёў. Асноўная прычына павышэньня коштаў на вышэйназваныя нафтапрадукты зьявілася павышэньне коштаў на расейскую нафту, а таксама некаторае зьніжэньне курсу беларускага рубля адносна даляру ЗША. Апошняе павышэньне кошту на нафтапрадукты было 14 жніўня гэтага году.

---

Лідэры палітычных партыяў і грамадзкіх рухаў Беларусі, якія ўваходзяць у шырокую грамадзянскую кааліцыю, выступілі 14 верасьня з адкрытаю заяваю. Уладзімер Ганчарык, Сяргей Калякін, Павал Казлоўскі, Васіль Лявонаў, Міхаіл Марыніч, Мікалай Статкевіч, Аляксандар Бухвостаў, Станіслаў Шушкевіч, Юры Хадыка, Валянціна Палевікова, Аляксандар Ярашук заявілі, што ў выніку грубага і надзвычай цынічнага парушэньня выбарчых працэдураў у пэрыяд падрыхтоўкі і правядзеньня прэзыдэнцкіх выбараў 9 верасьня ў Беларусі адбыўся захоп улады. “Беларускі рэжым скарыстаў усю моц дзяржаўнага апарату, выканаўчых ворганаў, спэцслужбаў, каб сфальсыфікаваць вынікі першага тура выбараў на карысьць Лукашэнкі. Мэта гэтага беззаконства відавочна: беларускі дыктатар і ягоныя паплечнікі хочуць адцягнуць сваю паразу і поўны палітычны крах”, – гаворыцца ў заяве.

---

17 верасьня Генадзю Карпенка споўнілася б 52 гады. 17 верасьня Андрэй Клімаў, які знаходзіцца ў турэмных засьценках сустрэне свае 36 гадоў. 16 верасьня роўна два гады, як былі выкрадзеныя Віктар Ганчар і Анатоль Красоўскі. 17 верасьня каля адміністрацыі Лукашэнкі паўстане ланцуг неабыякавых людзей з партрэтамі Генадзя Карпенкі, Андрэя Клімава, Віктара Ганчара, Анатоля Красоўскага, Зьміцера Завадзкага, Юры Захаранкі. Родныя і блізкія, калегі і сябры, проста неабыякавыя людзі стануць у гэты дзень насупроць рэзыдэнцыі Лукашэнкі па адрэсе К. Маркса, 38 а 17.00.

---

Амбасадар Злучаных Штатаў у Арганізацыі Бясьпекі й Супрацоўніцтва ў Эўропе Дэйвід Джонсан выступіў на паседжаньні Сталай Рады АБСЭ ў Вене. "Ужо нейкі час Злучаныя Штаты ды іншыя заклікаюць Беларусь гарантаваць усім сваім грамадзянам фундамэнтальныя свабоды, на падставе якіх збудаваная Эўраатлянтычная супольнасьць і АБСЭ, а таксама прытрымлівацца свайго абавязаньня стварыць справядлівыя ўмовы для прэзыдэнцкіх выбараў. Мы пасьлядоўна заклікалі Менск выконваць прынятыя на сябе абавязаньні і жыць у адпаведнасьці з каштоўнасьцямі, зь якімі Беларусь зьвязала сябе, далучыўшыся да гэтай арганізацыі. На жаль, гэтыя заклікі засталіся непачутыя", - заявiў Джонсан.

---

Беларуская асацыяцыя журналістаў зьвярнулася ў пракуратуру Беларусі з просьбай тэрмінова спыніць парушэньне правоў некаторых незалежных выданьняў, а таксама прыцягнуць да адказнасьці Ўладзімера Глушакова, першага намесьніка старшыні Дзяржкамдруку, які адначасова выконвае абавязкі дырэктара прыватнай друкарні "Мэджык" і ўзяў на сябе функцыі цэнзара.

---

Шасьцёра ўзброеных людзей у міліцэйскай форме пастукалі ў дзьверы каардынатара “Незалежнага назіраньня” ў Шклоўскім раёне Паўла Нягурскага 7 верасьня позна вечарам. Яны адмовіліся прадставіцца і назваць прычыну такога позьняга візыту. Гаспадар не ўпусьціў у дом няпрошаных гасьцей і патэлефанаваў у міліцыю, а пасьля ў пракуратуру Шклову. Пракурор Сьніткоў сказаў, што гэта ён даў загад даставіць Нягурскага ў пракуратуру.

---

Аляксандар Лукашэнка, які год таму асабіста наведаў расейскую амбасаду на менскай вуліцы Старавіленскай, каб выказаць свае спачуваньні ў сувязі з пагібельлю падводнай лодкі “Курск”, адмовіўся 13 верасьня наведаць суседнюю амэрыканскую амбасаду, дзе была адкрыта кніга. спачуваньняў. А.Лукашэнка адправіў замест сябе свайго міністра замежных справаў Міхаіла Хвастова, У адрозьненьні ад Расеі і Ўкраіны, Беларусь наогул вырашыла не праводзіць афіцыйных траурных мерапрыемстваў у сувязі з тэрактамі ў ЗША і працягвае радавацца песьнямі і пляскамі ў рамках Дзён культуры Яраслаўскай вобласьці ў Менску.

---