Два гады таму зьніклі Віктар Ганчар і Анатоль Красоўскі :: Charter'97 :: News

Першы віцэ-сьпікер Вярхоўнага Савету Беларусі 13-га скліканьня, старшыня Цэнтральнай выбарчай камісіі Віктар Ганчар бясьсьледна зьнік у Менску 16 верасьня. Разам са сваім сябрам бізнэсмэнам Анатолем Красоўcкім Ганчар вяртаўся дадому. Пазьней на мяркуемым месцы выкраданьня - вуліцы Фабрычнай – былі знойдзены рэшткі шкла аўтамабілю і кроў выкрадзеных.

У траўні 1999 году Ганчар, як было прадпісана Канстытуцыяй, арганізаваў кампанію па выбарах прэзыдэнта Беларусі, сарваную ўладамі. У ліпені 1999 году Ганчар аб’явіў пра сканчэньне тэрміну легітымнага прэзыдэнцкага кіраваньня Аляксандра Лукашэнкі. Некалькі гадоў раней Віктар Іосіфавіч прымаў актыўны ўдзел у працы Вярхоўнага Савету падчас канстытуцыйнай крызы 1996 году. Ягоныя дзеяньні ў апазыцыі і вымусілі сёньняшнія ўлады выкрасьці актыўнага апанента - упэўненыя сваякі й сябры зьніклых. Да гэтага часу патрабаваньні аб рассьледаваньні зьнікненьня Ганчара й Красоўскага фігуруюць у разнастайных дакумэнтах міжнародных арганізацыяў і структураў.

Як заявіла ў інтэрвію БелаПАН жонка Ганчара Зінаіда Ганчар, на працягу двух гадоў “улады нават не спрабавалі стварыць ілюзыю пошуку тых, хто зьнік”. “Я ўпэўнена, што гэта было выкраданьне – выкраданьне чалавека, які, на мой погляд, быў галоўным апанентам рэжыму Лукашэнкі. Я спадзяюся, што Віктар жывы, што рука таго, каму даручылі гэтае забойства, усё ж такі здрыганулася. Зараз, пасьля выбараў, усё залежыць ад пазыцыі грамадзтва. Увесь гэты час я патрабавала ад уладаў правесьці рассьледаваньне і паведаміць поўную і праўдзівую інфамацыю пра тое, што здарылася. І ўсё ж такі злачынцы павінны ведаць: “заўтра” напаткае кожнага зь іх праз пяць, праз дзесяць гадоў, але напаткае абавязкова”, - сказала Зінаіда Ганчар.

Жонка выконваючага абавязкі старшыні Вярхоўнага Савету Беларусі 13-га скліканьня мае намер прыняць удзел у акцыі “Ланцуг неабыякавых людзей”, якая павінна прайсьці а 17.00 17 верасьня каля рэзыдэнцыі Аляксандра Лукашэнкі.