Ліцэісты Сьветлагорску пікетуюць гарвыканкам :: Charter'97 :: News

17 верасьня з 7.20 да 8 гадзінаў 15 хвілінаў ліцэісты Сьветлагорску правялі пікет каля будынку гарвыканкаму, на цэнтральнай плошчы гораду. Такія пікеты, накіраваныя супроць закрыцьця ліцэя, праводзяцца навучэнцамі кожны дзень перад пачаткам заняткаў. Маладыя людзі выходзяць на плошчу пад лёзунгамі, сярод якіх: “Не дадзім закрыць ліцэй!”, “Захаваем адзіную ў горадзе беларускамоўную ўстанову!” і “Не жадаем вяртацца ў сярэднюю школу!”.

Сёньня, а 16 гадзіне, ліцэісты плянуюць правесьці такое пікетаваньне каля будынку гарадзкога аддзелу адукацыі. “Заняткі ў ліцэі праходзяць у звычайным рэжыме, хоць з 17 верасьня фінансаваньне навучальнай установы спынена”, - адзначыў дырэктар Сьветлагорскай філіі Нацыянальнага гуманітарнага ліцэю імя Якуба Коласа Тэльман Масьлюкоў. Ён выказаў надзею, што гарадзкія ўлады не дапусьцяць ліквідацыі ліцэю як асноўнай навучальнай установы. “Мы адчуваем моцную падтрымку тых, хто знаёмы з нашай працаю”, - падкрэсьліў Масьлюкоў.

Па ягоных словах, бацькі навучэнцаў зьвярнуліся да міністра адукацыі зь лістом супраць закрыцьця ліцэя, а кіраўніцтва грамадзкага аб’яднаньня “Таварыства беларускай мовы імя Францішка Скарыны” накіравала такія звароты кіраўніку Адміністрацыі прэзыдэнта Ўралу Латыпаву і віцэ-прэм’еру ўраду Міхаілу Дзямчуку.

“Кожны дзень нам тэлефануюць, дасылаюць лісты з адной просьбаю – захаваць ліцэй”, - кажа Масьлюкоў. Па ягоных словах, ліст у падтрымку навучальнай установы прыйшоў у гарвыканкам з Інстытуту гісторыі Нацыянальнай акадэміі навук Беларусі, які шмат гадоў супрацоўнічае зь ліцэям у арганізацыі археалягічных дасьледваньняў на тэрыторыі Гомельскай і Магілёўскай вабласьцей.

Нагадаем, што загад аб закрыцьці філіі ліцэю быў выдадзены 11 верасьня. Згодна гэтаму дакумэнту, усе ліцэісты пераводзяцца ў СШ №1 Сьвятлагорску, а адзін з будынкаў навучальнай установы перадаецца Дому дзіцячай і тэхнічнай творчасьці. У загадзе ўсё гэта падаецца як “рэарганізацыя навучальнай установы”. Аднак, згодна неафіцыйнай вэрсыі, прычынай закрыцьця філіі ліцэю стала зарганізаваная там 7 верасьня сустрэча навучэнцаў, настаўнікаў і гарадзкой інтэлігенцыі з пісьменьнікам Уладзімерам Арловым, які не даспадобы ўладам.