Зінаіда Бандарэнка вырашыла ісці ў дэпутаты :: Хартия'97 :: Новости

Зінаіда Бандарэнка вырашыла ісці ў дэпутаты. Аднак акруговая камісія Смаргоні адмовіла Народнай артыстцы Беларусі ў рэгістрацыі ініцыятыўнай групы. Падставай для такаго рашэння стаў той факт, што адзін з членаў ініцыятыўнай групы Бандарэнка псіхічна хворы чалавек, пазбаўлены судом права галасавання. А таксама таму, што тры чалавекі ў самы апошні момант адмовіліся збіраць прдпісы за Бандарэнка і напісалі адпаведныя заявы.

- Вядома, ціск з боку мясцовай улады на тых, хто быў гатовы ісці па кватэрах і збіраць за мяне подпісы, вёўся вялікі, - распавяла Зінаіда БАНДАРЭНКА. - Настаўніцу мясцовай школы, якая жыве ў інтэрнаце, выклікалі і сказалі, што, калі яна не адмовіцца выйсці з ініцыятыўнай групы, яе пазбавяць пакоя ў інтэрнаце.

Але ж і мая каманда сама крыху вінаватая ў тым, што адбылося. У яе склад увайшло 55 чалавек, і я не магла праверыць літаральна кожнага. Тым не менш мы напісалі скаргу ў Цэнтрвыбаркам, таму што ўсё роўна ў нас застаецца магчымасць пачаць збор подпісаў.

Канчатковы адказ з Цэнтральнай выбарчай камісіі Зінаіда Бандарэнка павінна атрымаць ужо сёння.

Зінаіда Аляксандраўна кажа, што невыпадкова вырашыла балатавацца ў дэпутаты ў Смаргоні. Магла б, вядома, паспрабаваць выйграць выбары па адной з выбарчьіх акруг Мінска, дзе яна прапісана. Але тады б ёй прыйшлося сапернічаць з Уладзімірам Парфяновічам. А паколькі такіх мужных людзей у сённяшняй Беларусі няшмат, кажа Бандарэнка, яна не захацела складаць яму канкурэнцыю.

У Смаргоні былую тэлевядучую добра ведаюць. "Неаднойчы, - узгадвае народная артыстка Беларусі, - смаргонцы прыязджалі да мяне на тэлебачанне, пісалі цёплыя лісты, падтрымлівалі, калі мне прыйшлося звольніцца з Белтэлерадыёкампаніі". Апошнім часам Бандарэнка часта наведвае Смаргонь, і, як адзначае сама, ёй прыемна ведаць, што простыя людзі па-ранейшаму памятаюць яе.

Бандарэнка магла б стаць саперніцай Таццяне Голубевай - цяперашняй дэпутату Палаты прадстаўнікоў, якая некалі выбіралася ў Віцебскай акрузе. А цяпер, кажуць, не рызыкнула там балатавацца. У Смаргоні Голубева 10 гадоў таму кіравала сілікатным заводам, была яго генеральным дырэктарам. "Калі яна прыехала ў Смаргонь, стала адразу зразумела, што ўсё будзе рабіцца пад яе, - кажа Зінаіда Бандарэнка. Кіраўніку маёй ініцыятыўнай групы Тадэвушу Картавіку амаль афіцыйна было сказана: "Ну і нарабілі вы тут шуму з Зінаідай Аляксандраўнай. Уладам трэба будзе як след папрацаваць, каб людзі прагаласавалі за Голубеву".

Як вядома, акрамя вылучэння праз збор подпісаў выбаршчыкаў існуюць яшчэ дзве магчымасці абірацца ў Палату прадстаўнікоў. Можна балатавацца ад палітычных партый ці ад працоўных калектываў. Што датычыць калектываў, то тут перспектывы ў Зінаіды Бандарэнка невялікія. Вопыт папярэдніх выбараў паказвае, што дзяржаўныя прадпрыемствы, як правіла, вылучаюць кандыдатаў з так званага ўрадавага спісу. Трапіць у яго народная артыстка Беларусі, вядомая сваім стаўленнем да існуючай улады, наўрад ці зможа.

Зінаіда Бандарэнка сваю пазіцыю выказала яшчэ напярэдадні прэзідэнцкіх выбараў 2001 года.

Тады з`явілася перадвыбарная ўлётка "Час выбіраць" з партрэтам Зінаіды Бандарэнка і яе словамі "Спрадвеку беларусы лічацца лагоднымі, добразычлівымі і цярплівымі. Прыходзіць хамская ўлада, а мы ўсё церпім... I вось - нам даецца шанц!". Пасля прэзідэнцкіх выбараў Бандарэнка ўвайшла ў склад грамадскай ініцыятывы "За новую Беларусь!", стала сябрам Аб`яднанай грамадзянскай партыі.

Шостага верасня, згодна з Выбарчым кодэксам, заканчваецца вылучэнне кандыдатаў ад партый і працоўных калектываў. I тады стануць вядомыя імёны ўсіх, хто паспрачаецца за дэпутацкае крэсла.

Белоруссия