Удзельнік падзеяў 25 сакавіка: «Яны мяне потым завалілі, і адзін даў ботам у галаву» :: Хартия'97 :: Новости

Аляксандар Цішук быў зьбіты ў Менску 25 сакавіка падчас шэсьця да турмы на Акрэсьціна. Яго даставілі ў 4-ты клінічны шпіталь, зафіксавалі сьляды зьбіцьця. 25 сакавіка, калі мірных дэманстрантаў атакавалі міліцыянты, менавіта побач зь ім выбухнула шумавая граната, а потым яго зьбілі, і ён страціў прытомнасьць. “Гэта ўсё людзі ў чорным, што бяз касак. Першымі ішлі “касманаўты”, а пасярод іх гэтыя — у чорным. Яны мяне потым завалілі, і адзін даў ботам у галаву — я “вырубіўся”. Кроў пайшла з носу. Мяне чэскі карэспандэнт і мясцовыя людзі адцягнулі й паклалі на ўзбочыне”, -- расказаў мужчына "Радыё Свабода".

У шпіталі Аляксандар Цішук апынуўся поруч з чэскім карэспандэнтам, які яму дапамог, жыхаркай Менску Казаковай і лысаватым мужчынам гадоў шасьцідзесяці.

Спадар Цішук спамінае: з прычыны аглушэньня ён ня мог пачуць, адкуль дакладна прыехаў паранены мужчына. Але дакладна ведае: у таго была пашкоджана галава — уся ў крыві, былі сінякі — пад вокам і на баку, паранена рука. Аляксандар падбадзёрваў пакалечанага: трэба трымацца разам. Але таго павезьлі на рэнтген у вазку, і болей Цішук яго ня бачыў.

У самога Аляксандра Цішука былі разьбіты нага, галава й ссунута барабанная перапонка. У шпіталі на галаву наклалі шво, а таксама зрабілі рэнтген — галавы й нагі. Заставацца там ён пабаяўся — начаваў у сяброў, а назаўтра зьехаў дахаты ў Берасцескую вобласць. Паводле ягонага расповеду, на вакзале хадзілі міліцыянты з фотаздымкамі й прыглядаліся да людзей. На Цішуку была кідкая куртка, таму давялося скінуць яе й да аўтобусу ісьці ў швэдры.