Студэнтаў праграмы Каліноўскага затрымалі на мытні :: Хартия'97 :: Новости

Учора а 22 гадзіне вечара на памежным пераходзе “Брузгі” работнікамі беларускай мытні былі затрыманы студэнты Аляксей Трубкін і Барыс Гарэцкі. Гэтыя хлопцы вучацца ў Беластоцкім унівэрсытэце па праграме фонда Каліноўскага і вярталіся з Польшчы на калядныя вакацыі. Раней яны былі выключаныя з беларускіх навучальных установаў за ўдзел у акцыях пратэсту ў Менску.

Студэнты былі дапытаныя работнікам праваахоўных органаў, які адмовіўся паведаміць сваё прозьвішча. Пасьля 7-гадзіннага знаходжаньня ў адным з памяшканьняў мытні студэнтаў адпусьцілі. Пры гэтым у іх былі рэквізаваныя каштоўныя рэчы: у Трубкіна – сыстэмны кампутарны блёк, а ў Гарэцкага – ноўтбук. Як паведаміў «Радыё Свабода» Аляксей Трубкін, ён набыў сыстэмны блёк у якасьці каляднага падарунка бацькам і ў ім няма ніякай інфармацыі.

Учора ў 18.30 на чыгуначным вакзале ў Горадні мытнікі затрымалі Зьмітра Мальчыка. Ён ехаў у Горадню з Кракава на вакацыі. Зьміцер Мальчык таксама вучыцца ў Польшчы па праграме Каліноўскага, праведамляе «Радыё Свабода».

Паводле ягонага бацькі, Сяргея Мальчыка, хлопца дапытвалі супрацоўнікі праваахоўных органаў, якія былі ў цывільным. У яго быў канфіскаваны ноўтбук. У памяшканьні мытні Зьміцер Мальчык прабыў 5 гадзінаў, пасьля чаго яго адпусьцілі. У аўторак яму патрэбна зьявіцца ў Гарадзенскую рэгіянальную мытню.