Gazeta Wyborcza піша пра акцыі 25 сакавіка :: Хартия'97 :: Новости

“Музычны зварот за свабодную Беларусь”, “Польскія артысты салідарныя зь Беларуссю” - у публікацыяx пад такімі назвамі адпаведна варшаўскі ўкладыш у штодзёнку “Gazeta Wyborcza” і сталічная газэта “Życie Warszawy” паведамляюць пра канцэрт, які 25 сакавіка адбудзецца ў польскай сталіцы.

Як паведамляе Польскае радыё, падчас канцэрту “Салідарныя зь Беларусяй” польскія й беларускія музыкі засьпяваюць палымяныя гімны свабоды Боба Марлі. “Леташні канцэрт ў Варшаве сабраў 5 тыс. асобаў на плошчы, а 3 мільёны глядзелі канцэрт па тэлевізіі. На жаль, сёлета мы павінны ізноў ладзіць канцэрт, бо цягам году нічога ў Беларусі не памянялася – кажа адзін з арганізатараў Янэк Кэнцік зь ініцыятывы “Вольная Беларусь”.

Выступяць Kayah, Кася Насоўска, Мунек Сташчык, Лех Янэрка і Sydney Polak. Зь Беларусі прыедуць, між іншым, гурт Б.Н. і Лявон Вольскі з NRМ. Прозьвішчаў іншых удзельнікаў зь Беларусі арганізатары не выяўляюць з увагі на іх бясьпеку – паведамляе “Gazeta Wyborcza”. А “Życie Warszawy” дадае, што на канцэртнай сцэне польскіх музыкаў будуць суправаджаць вядомыя польскія акторы Мацей Штур, Мая Камароўска, Зьбігнеў Замахоўскі.

Арганізатары плянуюць наладзіць тэлемост з удзельнікамі падобнай імпрэзы ў Менску. Сёлетні канцэрт “Салідарныя зь Беларусяй” будзе трансляваць Першы канал Польскай тэлевізіі, ТV Polonia ды Эўрапейскае радыё для Беларусі”– чытаем у газэце “Życie Warszawy”.