Аляксандр Мілінкевіч: «25 сакавіка я прыйду на плошчу Каліноўскага» :: Хартия'97 :: Новости

Сёньня, 19 сакавіка, заяўнікі акцыі 25 сакавіка меліся сустрэцца з гарадзкімі ўладамі, каб абмеркаваць фармат акцыі на Дзень Волі. Сустрэча прайшла ў Менскім гарвыканкаме ў прысутнасьці намесьніка старшыні гарвыканкаму Міхаіла Ціцянкова, начальніка менскай міліцыі Анатоля Куляшова і пракурора гораду Мікалая Куліка.

Заяўнікам акцыі было абвешчана, што правядзеньне акцыі 25 сакавіка на Кастрычніцкай плошчы "не магчымае". Быў "прапанаваны" альтэрнатыўны варыянт: збор удзельнікаў ля прэзыдыюму Нацыянальнай акадэміі навук, мірнае шэсьце па ходніках вуліцы Сурганава -- і мітынг на плошчы Бангалор. "У акцыі не павінны ўдзельнічаць больш за тысячу чалавек", - падкрэсьлілі ў гарвыканкаме. Таксама будучым арганізатарам чарговы раз нагадалі пра магчымую адказнасьць за парушэньне правілаў правядзеньня мітынгаў і сходаў.

Аляксандар Мілінкевіч заявіў “Нашай ніве”, што рашэньне гарвыканкаму пра зьмяненьне фармату шэсьця не прымальнае, яно пярэчыць Канстытуцы.

«Мы прапанавалі ўладзе кампраміс і засьведчылі, што самі настроены супраць канфрантацыі. Сваёй адмовай ўлада не ўсьведамляе рэальнай сытуацыі ў краіне», -- заявіў Мілінкевіч.

Мілінкевіч заявіў, што 25 сакавіка пойдзе на плошчу Каліноўскага (Кастрычніцкую).

На сустрэчы прысутнічалі супрацоўнікі тэлевізіі, таму, магчыма, вынікі сустрэчы пакажуць у вечаровых навінах.

Нагадаем, што меркаваны пачатак акцыі ў Дзень Волі – у 12.00 на плошчы Каліноўскага.