«Адна-дзве тубы зубной пасты»
- 25.10.2016, 15:08
- 14,692
На столькі ў Беларусі павялічылі дапамогу бацькам, якія знаходзяцца ў дэкрэтным адпачынку.
«Салiдарнасць» палічыла, што змогуць купіць маладыя бацькі на штоквартальную прыбаўку.
З 1 лістапада ў Беларусі вырастуць дапамогі для бацькоў, якія знаходзяцца ў адпачынку для догляду за дзецьмі ва ўзросце да трох гадоў.
Суму гэтых выплат пераглядаюць раз на квартал у залежнасці ад росту або зніжэння сярэднямесячнага заробку за папярэднія тры месяцы.
З падлікаў, на першае дзіця з 1 лістапада дапамога вырасце на 7,87 рубля, на другога і наступных - на 9 рублёў, а на дзіця-інваліда - на 10,12 рубля.
Што ж могуць сабе дазволіць маладыя бацькі на такі дадатак да дапамогi?
Пачнем з адной з самых актуальных пазіцый - падпаскаў. На 8-9 дададзеных рублёў можна купіць амаль 30 падпаскаў (як беларускіх, так і імпартных). Калі пільнавацца рэкамендацый педыятраў, то гэтай колькасці падпаскаў можа выстарчыць на 3-4 дні.
Айчынныя малочныя сумесі для дзяцей ад 0 да 12 месяцаў каштуюць амаль 4 рублі. Імпартныя аналагі абыдуцца прыкладна ўдвая даражэй. Такім чынам, на падвышэнне можна купіць 1-2 пачкі сумесі.
На гэтую суму таксама можна купіць адну-дзве тубы (у залежнасці ад якасці і брэнда) зубной пасты без утрымання фтору (рэкамендуецца для дзяцей да 4 гадоў).
Калі вы надумалі зрабіць вашаму дзіцяці платную комплексную прышчэпку, то чарговая прыбаўка да дапамогi дазволіць вам кампенсаваць, да прыкладу, толькі 4% кошту французскай вакцыны «Пентаксім».