Навукоўцы патлумачылі прыроду чалавечай хлусні

Брытанскія і амерыканскія псіхолагі знайшлі прычыны, чаму чалавек пачынае рэгулярна хлусіць.

Прысвечанае гэтаму даследаванне апублікаванае ў часопісе Nature Neuroscience, коратка пра яго паведамляе выданне The Guardian (пераклад - lenta.ru).

Як паказалі эксперыменты навукоўцаў, малая хлусня, за якую чалавек атрымлівае нават невялікую выгаду, стымулюе адаптацыю нервовай сістэмы да далейшага падману.

Да сваіх высноў навукоўцы прыйшлі, прасачыўшы за паводзінамі 80 добраахвотнікаў, якія ўдзельнічаюць у спецыяльнай гульні. Валанцёры разбіваліся на пары, у кожнай з якіх прысутнічаў супольнік эксперыментатараў. Добраахвотнікі павінны былі ацаніць колькасць манет у банцы, паказанай на маніторы, але адзін з іх, хаўруснік навукоўцаў, меў відавочную выгаду - ён загадзя ведаў прыкладную колькасць грошай у ёмістасці і прымаў пастанову аб выдачы манет, аднак ягоны заробак вызначаўся розніцай паміж уласнай ацэнкай колькасці манет і ацэнкай кампаньёна.

Выявілася, што з цягам часу, падчас развіцця гульні, суўдзельнікі навукоўцаў падманвалі сваіх кампаньёнаў усё больш. Эксперыментатарам пры дапамозе магнітна-рэзананснай тамаграфіі атрымалася прасачыць змены, якія адбываюцца падчас гульні ў кары галаўнога мозгу хлусаў.

Высветлілася, што ў момант першай хлусні павышаную актыўнасць праявілі міндаліны. Па меры таго, як доўжылася гульня, праз 10-20 раўндаў - а палова яе ўдзельнікаў падманвала кампаньёнаў усё больш - такая мазгавая актыўнасць стала зніжацца. Такім чынам, на думку даследчыкаў, удзельнікі эксперыменту прыстасоўваліся да сістэматычнай хлусні. Навукоўцы мяркуюць, што такім чынам арганізм чалавека можа прывыкаць да падвышаных рызык або гвалту. У далейшым даследчыкі плануюць праверыць сваю здагадку.