Вугоршчына выклікала пасла РФ праз параўнанне падзей 1956-га з «пагромам»

Будапэшт мерыцца растлумачыць, што не трывае размоў «аб рэвалюцыі і яе героях» у прыніжальнай форме.

Вугорскае МЗС мерыцца растлумачыць, што не трывае размоў «у прыніжальнай манеры аб рэвалюцыі і яе героях», таму пасля з'яўлення ў расейскіх дзяржаўных СМІ паведамленняў пра ўгодкі антысавецкага паўстання 1956 года выклікала амбасадара Расеі ў Будапэшце.

Пра гэта паведаміла агенцтва Associated Press са спасылкай на заяву ўстановы.

Паводле заявы вугорскага МЗС, расейскія дзяржаўныя СМІ апісалі бунт 1956 года як «пагром» і першую «каляровую рэвалюцыю», падобна да «аранжавай рэвалюцыі», якая адбылася ва Украіне ў 2004 годзе, што мае на ўвазе, што за паўстаннем стаялі ЗША, паведамляе РБК са спасылкай на агенцтва Associated Press.

Увечары 23 кастрычніка на тэлеканале «Расія 1» выйшла праграма Дзмітрыя Кісялёва «Весткі тыдня» з сюжэтам пра гадавіну паўстання. Пачатковая актыўная фаза паўстання ў ёй называецца «пагромамі», а таксама дапускаецца, што менавіта ў 1956 годзе ў Вугоршчыны «і была першая ў прыязных нам краінах« каляровая рэвалюцыя».

З заклікам да МЗС Вугоршчыны адрэагаваць на сюжэты ў расейскіх СМІ звярнулася апазіцыйная партыя «Палітыка можа быць іншай», што пазіцыянуе сябе як экалагічная і радыкальна-дэмакратычная, удакладняе Associated Press.

У канцы мінулага тыдня ў Вугоршчыне прайшлі святкаванні з нагоды 60-годдзя паўстання супраць прасавецкага рэжыму, якое адбылося ўвосень 1956 года і было здушанае савецкімі танкамі.

Выступаючы на адной з імпрэз, прэм'ер-міністр Вугоршчыны Віктар Орбан заклікаў не дапусціць саветызацыі Еўропы і абараніць ад гэтай з'явы ўвесь Еўразвяз. Як паведамляў Reuters, выступ Орбана выклікаў воплескі тысяч сабраных, аднак некалькі сотняў апанентаў яго асвісталі, і пасля адбыліся сутычкі.