«Дэкрэт аб зямлі» - апошнія сутаргі Лукашэнкі

Дыктатара трэба проста гнаць у шыю.

Пра гэта ў інтэрв'ю сайту Charter97.org заявіў лідар камітэта падтрымкі прадпрымальнікаў «Салідарнасць», былы палітвязень Мікалай Аўтуховіч, каментуючы вынікі нарады па змене заканадаўства аб адабранні і выдаванні зямельных участкаў, якую ўчора правёў беларускі дыктатар:

- У Лукашэнкі відавочна не стае сродкаў, таму ён шукае любымі шляхамі крыніцы даходаў. Зараз ён паспрабуе прадаць зямлю замежнікам. Гэты «дэкрэт аб зямлі» - проста дурасць, нейкі царызм, Лукашэнка творыць немаведама што. Гнаць яго трэба ў шыю.

Апошнія дэкрэты Лукашэнкі - гэта агонія, рабаванне беларусаў. Ён кажа, што нібыта робіць гэта для эканомікі, а на самай справе забірае ў людзей апошняе, народ галее. Зрабіць так, каб народ багацей жыў – вось гэта паказчык дабрабыту дзяржавы, а не тое, колькі ў кіраўніка грошай і рэзідэнцый.

Усе сённяшнія дэкрэты, указы дыктатара – гэта апошнія сутаргі, ён разумее, што арэлі народнага незадаволенасці разгойдваюцца, іх немагчыма спыніць.

На жаль, Лукашэнка яшчэ некаторы час будзе і не такія выдаваць дэкрэты, спрабаваць «заціскаць гайкі».

- Вам як лідару прадпрымальнікаў даводзіцца часта мець справу з падатковай і дзяржаўнымі органамі. Адчуваецца па іх працы, што ўлада дыктатара захісталася?

- Хачу закрануць тэму працы падатковай, якая сёння не хоча прымаць абсалютна ніякіх заяваў. Падаткавікі хочуць забіраць у народа грошы, але не хочуць пакідаць слядоў.

Прыходзіш у падатковую з любой заявай, а там кажуць: вы яе пакладзіце, пры гэтым рэгістраваць адмаўляюцца, хоць і абавязаныя.

Падатковая нават перастала адказваць на запыты прадпрымальнікаў, хоць на заяву, скаргу яны павінны цягам месяца адрэагаваць. Калі зварот не зарэгістраваць, яны кажуць, што «нічога не атрымлівалі». Таму прадпрымальнікі цяпер адпраўляюць у падатковую толькі заказныя лісты. Відавочна, што падаткавікі не хочуць пакідаць слядоў беззаконня, якое чыніцца. Яны разумеюць, што Лукашэнка патрабуе незаконна забіраць у людзей грошы.

Мы іх прымушаем рэгістраваць, а падатковая трасецца не ведаючы, што рабіць, так як разумее, што ўлада зменіцца і ім давядзецца адказаць за свае дзеянні. Люстрацыя непазбежная – гэта 100%.

Ёсць кніга «Люстрацыя для Беларусі», якую мы памнажаем і рассылаем начальнікам міліцыі. Хай яны ўсведамляюць, што ўлада зменіцца і ім давядзецца адказваць за свае ўчынкі.