Зяленскі расказаў лідарам Кангрэса ЗША пра выкарыстанне ATACMS

Прэзідэнт Украіны падзякаваў ім за двухпартыйную падтрымку.

Прэзідэнт Украіны Уладзімір Зяленскі ў чацвер, 25 красавіка, пагаварыў з лідарамі Кангрэса ЗША і расказаў ім пра выкарыстанне дальнабойных ракетаў ATACMS ва Украіне.

Пра гэта гаворыцца ў Telegram-канале Зяленскага.

Прэзідэнт правёў тэлефонныя размовы са спікерам Палаты прадстаўнікоў Майкам Джонсанам, лідарам рэспубліканцаў у Сенаце Мітчам Маканэлам і лідарам дэмакратычнай большасці ў Сенаце Чакам Шумерам. Зяленскі падзякаваў ім за «двухпартыйную падтрымку і асабістае лідарства ў зацвярджэнні закона аб дапамозе Украіне».

«Мы ўдзячныя прэзідэнту ЗША Байдэну і ўсяму амерыканскаму народу за дапамогу Украіне», – напісаў Зяленскі.

Зяленскі дадаў, што расказаў кангрэсмэнам пра сітуацыю на фронце ва Украіне і патрэбу ва ўзмацненні паветранай прасторы сістэмамі Patriot, а таксама пра «карыснасць ад дальнабойных сістэмаў ATACMS».

24 красавіка агенцтва Reuters са спасылкай на амерыканскага чыноўніка паведаміла, што ЗША ўжо таемна выправілі Украіне ATACMS. Паводле інфармацыі журналістаў, Украіна выкарыстоўвала іх для ўдараў у Крыме на мінулым тыдні. Пазней гэтую інфармацыю пацвердзілі ў Пентагоне.