Ракеты атакавалі Украіну, выкарыстоўваючы паветраную прастору Гомельскай вобласці

Гэта зрабіла немагчымым іх выяўленне і знішчэнне сродкамі СПА.

У ноч з 26 красавіка на 27 красавіка некалькі расейскіх ракет прайшлі праз паветраную прастору Беларусі. Пра гэта паведамлялі два ўкраінскія маніторынгавыя каналы, піша «Флагшток».

Канал Monitor апублікаваў інфаграфіку Texty.org.ua руху паветраных цэляў над Украінай 26-27 красавіка.

Схема паказвае, што хуткасныя цэлі або ракеты «Кінжал», запушчаныя над тэрыторыяй РФ, увайшлі ў паветраную прастору Чарнігаўскай вобласці, перасеклі тэрыторыю Беларусі над Брагінскім раёнам і працягнулі рух над Кіеўшчынай у кірунку захаду Украіны.

У адпаведнасці з інфаграфікай Monitor, ракеты пераадолелі ў паветранай прасторы Беларусі ад 19 да 24 кіламетраў.

Маніторынгавы канал «Український Єнот» у публікацыі 27 красавіка пракаментаваў гэты інцыдэнт:

«Што яшчэ цікавага - частка ракет тыпу Killjoy (Х-47М2 «Кінжал») праляцела над тэрыторыяй Беларусі, што зрабіла немагчымым іх заўчаснае выяўленне сродкамі СПА і знішчэнне».

Прадстаўнік канала ўдакладніў гэтую інфармацыю «Флагштоку»: звесткі былі атрыманы з сістэм СПА Украіны. Першы пуск быў перад поўначчу 26 красавіка, наступныя пускі былі 27 красавіка пасля 5 гадзін раніцы.

Інфармацыі аб пусках ракет СПА з месцаў базавання ў Гомельскім, Ельскім і Мазырскім раёнах Беларусі 26-27 красавіка не паступала. З гэтага можна зрабіць выснову, што супрацьпаветраная абарона Беларусі не змагла адрэагаваць на з'яўленне ракет над сваёй зонай адказнасці або свядома не рэагавала.

Раней над тэрыторыяй Беларусі ўжо фіксаваўся «транзітны» пралёт расейскай паветранай цэлі. У 2023 годзе 25 кастрычніка расейскі беспілотнік скарыстаўся паветранай прасторай Беларусі. Тады сістэма СПА, размешчаная ў Мазырскім раёне, дала залп па цэлі, аднак знішчыць БПЛА не змагла. Беспілотнік працягнуў рух у Кіеўскай вобласці.