У Беларусі ўводзяць маштабныя змены для «дармаедаў»

Шукаць беспрацоўных будуць пры дапамозе МУС РФ.

У студзені 2024 года ў дэкрэт “Аб спрыянні занятасці”, больш вядомы як дэкрэт аб «дармаедах», урад краіны сваёй пастановай №53, апублікаванай на Нацыянальным прававым партале, унёс даволі шмат змен. Частка з іх увайшла ў дзеянне ў лютым, частка - у сакавіку і красавіку. Новыя змены - з 1 траўня, а таксама з 1 жніўня, піша «Комсомолка».

Патраплянне ў базу «дармаедаў» чалавека, які валодае кватэрай, аўтаматычна і істотна падвышае для яго кошт жыллёва-камунальных паслуг да ўзроўню кампенсацыі эканамічна абгрунтаваных выдаткаў.

Перш за ўсё, з 1 красавіка 2024 г. спісы працаздольных грамадзян, не занятых у эканоміцы, якія аплачваюць паслугі з кампенсацыяй выдаткаў, фармуюцца і зацвярджаюцца не раз на квартал, а кожны месяц.

А з 1 траўня ў Беларусі набудуць моц змены, праз якія беларусы змогуць атрымліваць звесткі аб уключэнні іх у спісы “дармаедаў” онлайн праз Агульнадзяржаўную аўтаматызаваную інфармацыйную сістэму (электронную паслугу ААІС). Інфармацыя будзе даступная з 1-га дня месяца, наступнага за месяцам зацвярджэння такога спісу

Беларускіх “дармаедаў” выяўляюць з дапамогай МУС Расеі

З 1 лютага пры фармаванні базы “дармаедаў” у Беларусі ўлічваецца і інфармацыя МУС Расеі. А МУС Беларусі на падставе атрыманых звестак штомесяц да 20-га чысла павінна перадаваць у Дзяржаўны памежны камітэт краіны інфармацыю аб беларусах, якія выехалі з тэрыторыі Расеі і заехалі на тэрыторыю Расеі праз пункты пропуску расейскай дзяржаўнай граніцы.

Таксама МУС павінна падаваць у Мінпрацы і сацабароны Беларусі звесткі аб грамадзянах, якія аформілі выезд для пастаяннага пражывання за межамі Беларусі або стаяць на міграцыйным уліку ў Расеі.

А Дзяржаўным памежным камітэце Беларусі 4 разы на год падае ў Мінпрацы і сацабароны звесткі аб грамадзянах ва ўзросце ад 18 гадоў да агульнаўстаноўленага пенсійнага ўзросту, якія выехалі з Беларусі, а таксама з тэрыторыі Расеі і адсутных сумарна 30 і больш каляндарных дзён на квартале.

Не пападаюць у базу тыя, хто плаціць шэраг падаткаў

З 1 лютага да людзей, якія афіцыйна здаюць свае кватэры ў арэнду і выплачваюць фіксаваны падатак, такім чынам пазбягаючы траплянні ў базу “дармаедаў”, дадаліся тыя, хто здае ў арэнду афіцыйна нежылыя памяшканні, машына-месцы.

З 5 лютага 2024 г. індывідуальным прадпрымальнікам, каб не патрапіць у базу “дармаедаў”, ужо недастаткова быць проста зарэгістраванымі ў гэтым статусе. Неабходна выплачваць падаткі з даходу ад прадпрымальніцкай дзейнасці.

Што зменіцца для працоўных у краінах ЕАЭС

З 1 лютага менавіта наяўнасць працоўнай дамовы (кантракту) патрэбная беларускім спецыялістам, якія працуюць і пражываюць на тэрыторыі дзяржаў-удзельніц ЕАЭС, а гэта Расея, Казахстан, Арменія, Кыргызстан, каб не патрапіць у беларускую базу “дармаедаў”.

Вяскоўцам і фермерам трэба ўлічваць мясцовасць, дзе яны жывуць

Да 1 сакавіка 2024 г. даведка мясцовага органа ўлады, што ў чалавека ёсць зямельны надзел і ён вырошчвае на ім сельгаспрадукцыю, была гарантыяй нетрапляння ў базу “дармаедаў”. З вясны 2024 года абласным і Менскаму гарвыканкамам дэлегавана права вызначаць тэрыторыі, пры пражыванні на якіх грамадзяне, якія вырабляюць сельгаспрадукцыю, будуць прызнавацца незанятымі, з улікам рэгіянальных асаблівасцей і эканамічнай мэтазгоднасці.

Пад крытэр занятых у эканоміцы трапляюць тыя, напрыклад, хто займаецца вядзеннем асабістай падсобнай гаспадаркі, агародніцтвам, народнымі рамёствамі, вядзе фермерскую гаспадарку. Але такія людзі таксама большую частку часу павінны жыць у Беларусі. Адсутныя ў краіне 30 і больш дзён на квартал - пазбаўляюцца гэтай прывілеі.

Мамы могуць выязджаць з краіны на 30 дзён на квартал

З 1 сакавіка жанчына, якая выхоўвае дзіця ва ўзросце да сямі гадоў, а таксама траіх і больш непаўналетніх дзяцей, а таксама дзяцей-інвалідаў, прызнаюць занятымі толькі пры ўмове іх пражывання на тэрыторыі Беларусі. Выязджаць яны могуць, але не больш як на 30 дзён у квартале. Выключэнне - выезд з дзіцем для лячэння або аздараўлення за мяжу.

Будзе пашыраны функцыянал сакратароў камісій

З 1 жніўня 2024 года будзе пашыраны функцыянал сакратароў камісій у спрыянні занятасці ў раённых і гарвыканкамах.

Сакратары камісіі будуць працаваць з базай звестак, фармаваць спісы працаздольных грамадзян, якія не занятыя ў эканоміцы, аплачваюць паслугі з кампенсацыяй выдаткаў, што выехалі за межы Беларусі, выносіць на разгляд выканкамаў заявы “дармаедаў”, якія трапілі ў складаныя жыццёвыя абставіны. Сакратары камісіі будуць таксама кансультаваць людзей аб пунктах і навінах дэкрэта нумар 3.