СМІ: Раптам памёр другі інфарматар аб дэфектах Boeing

Ён патрапіў у лякарню праз «нечакана хуткае развіце інфекцыі».

У ЗША памёр другі інфарматар аб дэфектах у самалётах авіябудаўнічай кампаніі Boeing. Былы супрацоўнік пастаўшчыка Spirit Aerosystems Джошуа Дын памёр пасля «нечаканай хуткага развіцця інфекцыі», распавялі яго сваякі газеце The Seattle Times.

Дзіну было 45 гадоў. Як зазначае газета, ён вёў здаровы лад жыцця, але ён трапіў у шпіталь праз праблемы з дыханнем. Пасля двух тыдняў знаходжання ў крытычным стане ён памёр праз стафілакокавую пнеўманію.

У 2022 годзе ён выявіў, што механікі парушалі тэхналогію свідравання адтулін у гермашпангоўце самалётаў серыі MAX. Дын паведаміў пра гэта начальству, але яно праігнаравала сітуацыю. Падчас той самай праверкі ён не заўважыў іншы дэфект, што стала прычынай ягонага звальнення. Пазней ён паведаміў аб парушэннях у Федэральную ўправы грамадзянскай авіяцыі ЗША.

Нагадаем, у сакавіку ў ЗША былога інжынера Boeing Джона Барнэта, які абвінаваціў авіявытворцу ў выкарыстанні няякасных дэталяў, знайшлі мёртвым у сябе ў грузавіку. Са звестак амерыканскіх праваахоўнікаў, ён застрэліўся.

Самалёты Boeing апошнім часам адзначыліся некалькімі здарэннямі, праз якія эксплуатацыю шэрагу мадэляў паветраных суднаў прыпынілі ва ўсім свеце.

Адзін такі інцыдэнт адбыўся ў небе над амерыканскім штатам Арэгон увечары 5 студзеня. У самалёта Boeing 737, які рухаўся з Портленда ў Каліфорнію, праз 20 хвілін пасля пачатку палёту вырвала адзін з элементаў фюзеляжа з ілюмінатарам. А ў лютым самалёт Boeing 757, які выконваў рэйс з Сан-Францыска ў Бостан, проста падчас палёту страціў частку ашалёўкі правага крыла. У выніку экіпаж быў вымушаны здзейсніць аварыйную пасадку.

Федэральная ўправа грамадзянскай авіяцыі пачала расследаванне супраць Boeing, падчас якога выявіла шматлікія парушэнні пры вытворчасці. У выніку пастаўкі самалётаў істотна знізіліся - у першым квартале кампанія паставіла 83 самалёты, што на 36% менш, чым годам раней.