Беларусь сярод лідэраў па тэмпах росту інтэрнэт-паслуг
10:18, — Hi-tech
Найвышэйшы тэмп росту інтэрнэт-паслуг сярод краін Еўропы прадэманстравала Украіна: за паўгода рост паслуг склаў 2539,1 працэнты, хоць узровень пранікнення складае ўсяго 11,5% ад агульнай колькасці насельніцтва. На другім месцы па тэмпе росту – Беларусь (1785,8%). За ёй ідуць Расея (803,2%) і Турэччына (700%). Такія вынікі штогадовага даследавання InternetWorldStats, якое праводзіць кампанія Miniwatts Marketing Group.
За апошнія паўгода колькасць карыстальнікаў інтэрнэт-паслуг у Расеі вырасла на 803,2 працэнты і дасягнула 28 мільёнаў чалавек. У еўрапейскім хіт-лісце Расея апынулася ў пяцёрцы найбуйнейшых інтэрнэт-карыстальнікаў, а лідэрам стала Нямеччына.
Спецыялісты MMG правялі даследаванне ў 20 еўрапейскіх краінах. Паводле справаздачы, колькасць карыстальнікаў сусветнай павуціны ў Еўропе дасягнула 322 мільёнаў чалавек. Пры гэтым дзякуючы актыўнаму пранікненню глабальнай сеткі ў жыццё жыхароў Усходняй Еўропы рост узроўню інтэрнэт-паслуг склаў 206,2 працэнты.
Першае месца па колькасці карыстальнікаў заняла Нямеччына – 50,4 млн. інтэрнэтчыкаў, што складае 61 працэнт ад агульнага насельніцтва краіны. На другім радку спісу – Вялікабрытанія – 38 млн. «юзераў». Трэцяе месца ў Францыі – 33 млн. карыстальнікаў. За ёй ідзе Італія – 31 млн. чалавек.
Пятае месца заняла Расея (28 млн.). Так, паводле вынікаў даследавання, праведзенага фондам «Грамадская думка», найбольшая колькасць карыстальнікаў зафіксаваная ў Маскве і Прыволжскім рэгіёне – па 4,8 млн. чалавек. За імі ідуць Цэнтральны рэгіён (без Масквы) – 4,7 млн., Паўночна-Заходні – 3,4 млн., Сібірскі і Паўднёвы – па 3 млн., Уральскі – 1,7 млн. і Далёкаўсходні – 1,3 млн. чалавек. Пры гэтым у сярэднім па Расеі Інтэрнэтам карыстаюцца толькі 23% мужчын і 17% жанчын.
У першую дзесятку па колькасці карыстальнікаў глабальнай сеткі таксама патрапілі Іспанія (20 млн.), Турэччына (16 млн.). Галандыя з 12 млн. «юзераў» на восьмым месцы. Следам за ёй размясціліся Польшча (11 млн.) і Партугалія (8 млн.).
