Пракурор стаў ахвярай зямельных разборак

Кампанія па процідзеянні пазапраўнаму захопу зямель набірае ўсё большыя абароты. На мінулым тыдні проста на калегіі Генеральнай пракуратуры быў вызвалены ад занятай пасады пракурор Менскага раёна і горада Заслаўля Ігар Шкатула. Паднятае пытанне аб адпаведнасці занятым пасадам некаторых вышэйшых асоб пракуратуры Менскай вобласці.

Афіцыйна праверкай землекарыстання Камітэт дзяржкантролю і Генеральная пракуратура заняліся ў жніўні гэтага года. Рэальна ж праца ў гэтым кірунку пачалася яшчэ ў канцы 2006 года. Цяпер жа дбайна прадуманая і прапіараная аперацыя ўступіла ў завяршальную стадыю. На мінулым тыдні генпракуратура, а пасля і КДК правялі калегіі па выніках праробленай працы. У афіцыйным паведамленні пракуратура абмежавалася толькі агульнымі фразамі, не ўдаючыся ў канкрэтыку і тым больш не звяртаючы ўвагі на кадравае пытанне, якое было паднятае. А гэта менавіта яно выклікала найбольшы перапалох.

Як распавёў «Ежедневнику» адзін з удзельнікаў калегіі, такога ходу мала хто чакаў. Той жа І.Шкатула падаў у суд дзесяткі пазоваў аб канфіскацыі пазапраўна захопленых зямель, накіраваў дзесяткі запісак у розныя органы дзяржаўнага ўпраўлення аб ліквідацыі парушэнняў закона. На думку некаторых супрацоўнікаў пракуратуры, большага пры ўсім жаданні пры наяўных рэсурсах ён зрабіць не мог. Але ўсё ж яго знялі за тое, што недаглядзеў. На падыходзе – больш сур'ёзныя фігуры з Менскай абласной пракуратуры, прычым усе яны на той жа калегіі павініліся і паабяцалі выправіцца.

Справядлівасці дзеля варта адзначыць, што бязладдзя ў Менскам раёне сапраўды было выяўлена шмат. Судзячы па дадзеных КДК, усталяваныя шматлікія выпадкі падавання зямельных участкаў з парушэннем патрабаванняў заканадаўства, самавольнага заняцця зямель, высечкі лесу ў лясах першай групы і будаўніцтва без дазваленчых дакументаў, нямэтавага выкарыстання зямельных участкаў. Нават там, дзе адвод зямель павінен быў здзяйсняцца з дазволу прэзідэнта (ворныя землі і лясны фонд), службоўцы дазвалялі сабе сваволіць. Так, Менрайвыканкам прыняў рашэнне аб выдзяленні 9 зямельных участкаў плошчай 1,35 га, пакрытых лесам, для дачнага будаўніцтва ў дачных пасёлках Ждановічы-6 і Ждановічы-1, а таксама 12 зямельных участкаў плошчай 1,73 га лясных і ворных зямель без іх канфіскацыі ў дэпартамента фінансаў і тылу МУС для дачнага будаўніцтва ў дачным пасёлку «Крынічны» МУС РБ і на землях, якія прымыкаюць да пасёлка

Як паведамляе КДК, усяго на тэрыторыі Бараўлянскага, Ждановіцкага, Горанскага, Шчамысліцкага, Калодзішчанскага, Лошанскага, Луговасвабодскага, Навадворскага, Астрашыцка-Гарадокскага, Папернянскага, Міханавічскага, Мачулішчанскага, Юзуфоўскага, Сенніцкага, Самахвалавічскага, Хацежынскага і Пятрышкоўскага вясковых выканкамаў выяўленыя 198 фактаў самавольнага заняцця грамадзянамі і юрыдычнымі асобамі зямельных участкаў агульнай плошчай каля 12 га, з іх больш як палова прыходзіцца на лясны фонд. Толькі кадастравы кошт самавольна занятых участкаў складае каля 1,5 млн даляраў. На думку правяраючых, калі б выканкамы рэалізоўвалі ўчасткі праз аўкцыён, то іх кошт узрос бы шматкроць. Аднак гэты механізм папаўнення бюджэту чамусьці задзейнічаны не быў.

Большасць вінаватых у дадзеных парушэннях ужо даўно прыцягнутыя да адказнасці. У дачыненні некаторых былі нават узбуджаныя крымінальныя справы. Цяпер пракуратура пачала ўжываць меры да тых, хто па доўгу сваёй службы павінен быў першапачаткова спыняць дадзеныя парушэнні, а не дапушчаць, каб яны існавалі шмат гадоў. Першым паў пракурор Менскага раёна. На калегіі пракуратуры было сказанае таксама, што неўзабаве будзе разгледжанае пытанне аб адпаведнасці занятым пасадам і некаторых вышэйшых асоб пракуратуры Менскай вобласці. Пэўных прозвішчаў названае не было, але яны прагучалі ў кулуарах. Засталося толькі пачакаць, астыне генеральны пракурор Пётр Міклашэвіч ці працягне секчы пакутныя галовы.