Аляксандр Кулінковіч: «Я хацеў бы займацца музыкай у Еўрапейскай Беларусі»
4
12:58, — Палітыка
Лідэр групы «Нейра Дзюбель» Аляксандр Кулінковіч марыць займацца музыкай у Еўрапейскай Беларусі. «Я мог бы казаць тое, што я хачу, не асцерагаючыся пакарання. Пакарання ў выглядзе адмены канцэртаў, адсутнасці эфіру, спушчаных зверху ўказанняў і тэлефонных званкоў. Я хачу займацца музыкай, не парушаючы ніякіх законаў. У цяперашняй Беларусі я не магу так жыць. Што б я сёння не рабіў, я ўвесь час думаю: «Мяне могуць караць, мяне могуць пакараць…». На мой погляд, сёння ў Беларусі немагчымая свабодная творчасць», – заявіў музыка ў інтэрв'ю прэс-цэнтру Хартыі’97.
На думку Кулінковіча, «сёння ў нашай краіны адзіны шанец – прыняць прапановы Еўразвяза, хаця б толькі таму, каб не ісці на ўмовы Расеі. Нават, калі расейцы прапануюць казку і манну нябесную, нельга згаджацца ні ў якім разе. Расея – дзяржава, якая заўсёды ваявала і паводзіла сябе агрэсіўна па дачыненні да ўсіх. Расея – гэта вар'яцкі агрэсіўная дзяржава і нічога агульнага з такой краінай я не хацеў бы мець».
«Нармальны дыялог паміж уладай і апазіцыяй сёння неабходны. Я вельмі добра стаўлюся да ініцыятывы апазіцыі прапанаваць уладам дыялог. Іншае пытанне – ці адкажуць яны», – гаворыць музыка.
Аляксандр Кулінковіч мае намер прыйсці на Еўрапейскі Марш, які пройдзе ў Менску 14 кастрычніка. «Я, як правіла, наведваю ўсе мерапрыемствы апазіцыі. Для таго, каб спаць спакойна», – адзначыў музыка.
