Леанід Навіцкі: «Лепш падтрымайце Еўрапейскі Марш»
4
13:21, — Палітыка
Дэмакратычны актывіст Леанід Навіцкі выйшаў сёння на свабоду. Апазіцыянер правёў у спецпрыёмніку-размеркавальніку на Акрэсціна 10 сутак. Арыштоўвалі Навіцкага супрацоўнікі КДБ, якія канфіскавалі з яго кватэры 100 сцягоў Еўрапейскага Звязу і інфармацыйныя матэрыялы з еўрапейскай сімволікай. «Хтосьці з улады спрабаваў сарваць падрыхтоўку да Еўрапейскага Марша, аднак сёння гэта ўжо немагчымае. Замест бессэнсоўных спроб перашкодзіць нам, я б параіў уладам падтрымаць акцыю і выратаваць такім чынам і сябе, і краіну», – заявіў Леанід Навіцкі пасля выхаду з спецпрыёмніка ў інтэрв'ю прэс-цэнтру Хартыі’97.
Першапачаткова ў дачыненні Навіцкага быў складзены пратакол па артыкуле 23.34 Кодэкса аб адміністрацыйных правапарушэннях (заклік да ўдзелу ў несанкцыянаваным мерапрыемстве). Аднак 25 верасня ў судзе ўчастковы інспектар міліцыі Партызанскага РУУС, старэйшы лейтэнант Андрэй Добкін заявіў, што Леанід Навіцкі нібыта нецэнзурна лаяўся ва ўпраўленні міліцыі Партызанскага раёна, і таму ў дачыненні актывіста складзены пратакол па артыкуле 17.1 КаАП (дробнае хуліганства).
Улады пайшлі традыцыйным шляхам, арыштоўваючы патэнцыйна актыўных грамадзян напярэдадні масавых акцый, беспадстаўна абвінавачваючы іх у «хуліганстве». Так было ў 2006 годзе перад прэзідэнцкімі выбарамі, таксама адбывалася сёлета перад Днём Волі.
Суддзя Алена Ціценкова прызнала Навіцкага вінаватым і прысудзіла да 10 сутак арышту. Аднак, нагадаем, у дачыненні актывіста таксама складзены пратакол за арганізацыю Еўрапейскага Марша, таму не выключана, што над актывістам пройдзе яшчэ адзін суд.
14 кастрычніка ў Менску пройдзе Еўрапейскі Марш. Каб зрабіць прарыў на еўрапейскім кірунку і выратаваць беларускую эканоміку, апазіцыя настойліва прапаноўвае ўладзе правесці Еўрапейскі Марш сумесна. У сувязі з гэтым перамоўная група Еўрапейскага Марша накіравала адпаведны ліст намесніку кіраўніка адміністрацыі прэзідэнта Наталлі Пяткевіч. Аднак улада, а менавіта намесніца кіраўніка адміністрацыі прэзідэнта, маўчыць і адначасова развязвае рэпрэсіі супраць па-праеўрапейску настроенай моладзі.
Такая пазіцыя можа прывесці не толькі да адмовы эканамічнай дапамогі, якую ўлады просяць у Еўропы, але да ўвядзення новых санкцый. І адказнымі за гэта будуць міністр унутраных спраў Уладзімір Навумаў і намесніца кіравання адміністрацыі прэзідэнта Наталля Пяткевіч.
