У «Белтрансгаза» новы дырэктар

Наглядальны савет ААТ «Белтрансгаз» на паседжанні ў Менску абраў Уладзіміра Маёрава, які да сёння выконваў абавязкі кіраўніка гэтага прадпрыемства, генеральным дырэктарам таварыства.

Як паведаміў БелТА прэс-сакратар «Белтрансгаза» Уладзімір Чэкаў, таксама абраная дырэкцыя ААТ у складзе васьмі чалавек. У яе ўвайшоў прадстаўнік «Газпрома» Дзмітрый Аннюк.

Як ужо паведамлялася, новы склад наглядальнага савета ААТ «Белтрансгаз» абраны 25 ліпеня гэтага года на пазачарговым агульным сходзе акцыянераў «Белтрансгаза» ў Менску. У склад савета ўвайшоў прадстаўнік расейскага боку – намеснік старшыні праўлення ААТ «Газпром» Валеры Голубеў. Узначаліў наглядальны савет «Белтрансгаза» першы намеснік прэм'ер-міністра Беларусі Уладзімір Сямашка.

У мэтах стварэння сумеснай беларуска-расейскай газатранспартнай арганізацыі 18 траўня 2007 года ў Менску падпісаная дамова аб продажы «Газпрому» 50-працэнтнага пакета акцый ААТ «Белтрансгаз» коштам $2,5 млрд. Прадугледжваецца, што «Газпром» цягам 2007-2010 гадоў будзе штогод выкупляць па 12,5% акцый за $625 млн. У чэрвені гэтага года быў аплачаны першы пакет і 12,5% акцый ААТ «Белтрансгаз» паступіла ва ўласнасць ААТ «Газпром».