Чыноўнікі спужаліся паэзіі?
17:24, — Культура
Адкрыццё фестывалю сучаснай паэзіі “Парадак слоў” планавалася правесці ў мінскім Доме літаратара 2 кастрычніка. Пытанне з арэндай гэтага памяшкання, здавалася, было вырашана. Арганізатары ва ўсю рэкламавалі сваю імпрэзу. Але раптам яна апынулася пад пагрозай зрыву.
На адкрыццё фестывалю запрасілі літаратараў не толькі з Беларусі, але і з Украіны ды Расіі, у вялікай залі Дома літаратара меўся адбыцца ў межах фэсту і канцэрт гурта “Port Mone”. Арганізатар фестывалю “Парадак слоў” Мікалай Суліма распавёў «Радыё Рацыя» аб сітуацыі вакол фэсту.
- Нам адмовілі ў арэндзе і нічога практычна не патлумачылі. Выконваючы абавязкі намесніка начальніка ўпраўлення справамі прэзідэнта Казакевіч прыняў рашэнне адмовіць у правядзенні дадзенага мерапрыемства ў Доме літаратара. Хоць да гэтага дырэктар корпуса на Фрунзэ,5 запэўніваў, што ніякіх праблем з арэндай не будзе, і на днях будзе падпісана дамова.
Паэт Мікалай Суліма не першы раз ладзіць літаратурныя імпрэзы. Сёлетні фестываль “Парадак слоў” – ужо другі па ліку, да гэтага ён таксама арганізаваў у Мінску серыю вечароў пад падвоенай назвай “Навстречу-Насустрач”, дзе выступалі выступалі самыя яркія беларуска- і рускамоўныя паэты. Не ўпершыню ён сутыкаецца і з такім стаўленнем чыноўнікаў да падобных імпрэзаў. Яны проста не хочуць рызыкаваць, мяркуе Мікалай Суліма.
- З такой пазіцыяй неаднакроць даводзілася сутыкацца. Такую ж пазіцыю, напрыклад, агучыў дырэктар мінскага Палацу моладзі, які сказаў, што мы, маўляў, не ведаем, што вы там будзеце рабіць, якія вершы будзеце чытаць, чаму вучыць нашу моладзь. Таму сказалі: нам прасцей адмовіць, каб наогул не мець аніякіх праблем.
Яшчэ адзін арганізатар фэсту “Парадак слоў”, расійскі літаратар Андрэй Новікаў некалькі год таму ўсур’ёз зацікавіўся беларускай паэзіяй. Сёлета ў траўні ён зладзіў у Маскве паэтычныя чытанні з удзелам Андрэя Хадановіча ды іншых беларускіх паэтаў, а цяпер рыхтуе зборнік беларуска-расійскай паэзіі. Ён кажа, што ў Расіі падобных праблем з правядзеннем культурных вечарын няма. Ён можа толькі здагадвацца, чаму ў Беларусі паэзія, як і рок-музыка, выклікае такую рэакцыю ў чыноўнікаў.
- Такой праблемы ў нас у прынцыпе няма, бо ў Расіі хапае праблем і без паэзіі. Паэзія стварае праблемы толькі ў моцна забюракратызаванай краіне, як Беларусь. Сучасны паэтычны фестываль ужо загадзя мае такую “крамолу”, бо ў паэтаў няма абмежаванняў, у сваіх вершах яны кажуць тое, што хочуць. Можа гэта якраз і не падабаецца тым, хто адмовіў нам.
Паэта Адама Глобуса арганізатары фестывалю “Парадак слоў” запрасілі на адкрыццё - і ён з задавальненнем пагадзіўся. Навіне пра перанос фестывалю Глобус зусім не здзівіўся. Кажа, што гэта рэч звычайная.
- Трэба радавацца, калі не адмаўляюць (смяецца). Заўжды знаходзіцца нейкі “вахцёр”, якому нешта падаецца, які перастрахоўваецца. Хаця я лічу, што гэта поўнае глупства – ствараць інфармацыйную нагоду на роўным месцы. Прыйдуць паэты – пачытаюць вершы. Гэта тое самае, што ранішнік забараніць…
Арганізатарам удалося зрэагаваць аператыўна і знайсці залю, таму пяцідзённы літаратурны фестываль пройдзе, як тое планавалася. Акрамя Адама Глобуса на адкрыцці “Парадку слоў” 2 кастрычніка ў Пушкінскай бібліятэцы ў Мінску возьмуць удзел Алесь Камоцкі, Людміла Рублеўская, а таксама госці з Украіны Аляксандр Кабанаў ды Ірына Крук і расійскія паэты. Потым цягам тыдня штодня будзе адбывацца па вечарыне. Літаратары будуць перамяшчацца па Мінску – музей Ваньковічаў, музей Багдановіча ды Пушкінская бібліятэка – і па краіне. 5 кастрычніка яны наведаюць Бабруйск. Цікава, што ці не ўпершыню ў беларускага літаратурнага фестывалю знайшоўся сур’ёзны спонсар – “Баброў”. Кіраўнік бровару Сяргей Левін такую падтрымку патлумачыў не толькі імкненнем падтрымаць усё якаснае і беларускае, але і тым, што арганізатар – ягоны сусед па пляцоўцы.
