Ва Украіне лідзіруюць Партыя рэгіёнаў і БЮТ. Сацыялісты не праходзяць
18:15, — Палітыка
Па выніках апрацоўкі Цэнтральнай выбарчай камісіяй 94,17% пратаколаў, за Партыю рэгіёнаў прагаласавалі 34,17%, БЮТ – 30,8%, НУ-НС – 14,29%, КПУ – 5,37%, Блок Літвіна – 3,98%, СПУ – 2,95%, супраць усіх – 2,70%.
У Палтаўскай, Ровенскай і Кіраваградскай абласцях падлічаныя 100% бюлетэняў.
Паводле інфармацыі Цэнтральнай выбарчай камісіі, у датэрміновых парламенцкіх выбарах ва Украіне ўзялі ўдзел 62,38% выбаршчыкаў.
ЦВК чакае, што сёння, 2 кастрычніка, да абеду атрымае каля 100% дадзеных аб выніках выбараў у тэрытарыяльных акругах, атрыманых па электроннай сістэме Выбары.
Афіцыйна пра вынікі выбараў ЦВК абвесціць да 15 кастрычніка ўключна, калі ў распараджэнні Камісіі будуць сабраныя ўсе дадзеныя на папяровых носьбітах.
30 верасня ўкраінцы прагаласавалі ў 225 выбарчых акругах, у якіх былі створаныя 34 036 выбарчых участкаў. У выніку выбараў у Раду пройдуць тыя партыі і блокі, якія атрымаюць не менш як 3% галасоў выбаршчыкаў.
Паводле дадзеных прэс-службы ЦВК, удакладненая колькасць выбаршчыкаў (пасля перадачы спісаў выбаршчыкаў ад працоўных груп уліку выбаршчыкаў акруговым выбарчым камісіям) складае 37 млн 514 тысяч грамадзян.
