Нобелеўскую прэмію атрымала брытанская пісьменніца

Лаўрэатам Нобелеўскай прэміі па літаратуры за 2007 год стала брытанская пісьменніца Дорыс Лесінг. Яе імя абвясціў пастаянны сакратар Шведскай Каралеўскай акадэміі і сябар Нобелеўскага камітэта Хорас Энгдаль 11 кастрычніка. Узнагарода прысуджаная ёй з фармулёўкай "за поўнае скепсісу, страсці і празорчай сілы разуменне досведу жанчын".

Дорыс Лесінг нарадзілася ў 1919 годзе ў Керманшаху (Іран), дзяцінства і юнацкасць правяла ў Афрыцы, а з 1949 г. Жыве ў Лондане. Пачала друкавацца ў 1949 годзе. Яе дэбютны раман называўся "The Grass is Singing" ("Трава спявае"). Між 1952 і 1969 гадамі апублікавала напаўаўтабіяграфічную серыю з пяці раманаў і зборніка апавяданняў "The Children of Violence" ("Дзеці гвалту"), у 1979-1983 гады выпусціла серыю фантастычных раманаў "The Canopus in Argos: Archives Series" ("Канопус у Аргосе"). Пры станоўчым водгуку Браяна Олдзісса, крытыка і гісторыка навуковай фантастыкі, серыя была раскрытыкаваная за выкарыстанне канцэпцыі багоў-прышэльцаў. Адзін з яе самых вядомых раманаў – "The Golden Notebook" ("Залаты дзённік") – быў апублікаваны ў 1962 годзе і лічыцца класікай феміністычнай літаратуры.

Цырымонія ўручэння залатога медалю, дыплома Шведскай Каралеўскай акадэміі і чэку на 10 мільёнаў шведскіх крон (1,542 мільёна даляраў) адбудзецца ў Стакгольме 10 снежня 2007 года.

Правілы Шведскай Каралеўскай акадэміі забараняюць згадванне імёнаў патэнцыйных уладальнікаў прэміі не толькі ў прэсе, але і ў прыватных гутарках. Напярэдадні ўручэння ўзнагароды сябры Нобелеўскага камітэта галасуюць за аднаго з пяці кандыдатаў з кароткага спісу, змест якога застаецца тайнай.

Нагадаем, што другі год запар адным з намінантаў на Нобелеўскую прэмію па літаратуры быў вядомы беларускі пісьменнік Рыгор Барадулін.