Пратэстуючых прадпрымальнікаў запрасілі на перамовы

Як паведаміў БелаПАН сябар аргкамітэта па стварэнні рэспубліканскага грамадскага аб'яднання «За свабоднае развіццё прадпрымальніцтва» Аляксандр Таўстыка, да індывідуальных прадпрымальнікаў, якія цяпер удзельнічаюць у імправізаваным мітынгу каля гандлёвага цэнтра «Паркінг», прыехаў начальнік упраўлення прадпрымальніцтва Менгарвыканкама Аляксандр Каліноўскі, які прапанаваў прадпрымальнікам прыйсці 3 кастрычніка на перамовы па адрэсе Карла Маркса, 39, непадалёк ад Адміністрацыи прэзідэнта, каб яшчэ раз абмеркаваць з уладамі ўзніклыя праблемы.

Нагадаем, сёння праходзіць страйк прадпрымальнікаў, у якім бяруць удзел каля 30 тысяч чалавек. У акцыі ўдзельнічаюць Слуцк, Светлагорск, Баранавічы, Рэчыца, Салігорск, Слонім, Пінск, Бабруйск, Віцебск, Пружаны, Узда, Барысаў. У Менску спыненая праца практычна ўсіх гандлёвых цэнтраў: рынку «Ждановічы», «Паркінг», «Атлантик», «Еўропа», «Купалаўскі», «Свелта» і інш.

Прадпрымальнікі выступаюць супраць указу прэзідэнта № 760, паводле якога пачынаючы з 1 студзеня 2008 года ІП не могуць прыцягваць наёмных працаўнікоў, за выключэннем сяброў сям'і і блізкіх сваякоў. Яшчэ адным патрабаваннем ІП з'яўляецца прыняцце закона аб малым і сярэднім бізнэсе.