Яраслаў Раманчук: «Я не кажу, што наша эканоміка абваліцца заўтра, але праз год …»
6
12:30, — Эканоміка
Міністэрства статыстыкі і аналізу падлічыла, што ў студзені–жніўні гэтага года з стратамі спрацавалі 459 прамысловых прадпрыемстваў Беларусі, або 21,1% ад іх агульнай колькасці. Вядомы эканаміст Яраслаў Раманчук лічыць, што насамрэч «стратных» прадпрыемстваў не менш за палову.
– Гледзячы што і па якіх крытэрах лічыць стратным, – каментуе дадзеныя афіцыйнай статыстыкі Яраслаў Раманчук у інтэрв'ю «Белорусскому партизану». – Калі да тых 21,1% афіцыйна стратных прадпрыемстваў прыплюсаваць тыя, якія маюць практычна нулявую рэнтабельнасць або рэнтабельнасць да 5 працэнтаў, то мы атрымаем 40-45 працэнтаў прамысловасці, якая працуе ў мінус або практычна ў мінус. Я не кажу, што заўтра або праз дзень наша эканоміка абваліцца або грымне дэфолт. Такога, думаю, не адбудзецца як мінімум яшчэ год. Хоць хутка нашай эканоміцы давядзецца працаваць у куды больш складаных умовах, чым сёння, праз новыя цэны на расейскія энерганосьбіты.
Тут важна іншае. Наш урад практычна нічога не робіць, каб рэальна вырашаць праблему стратных прадпрыемстваў. Я асабіста не ведаю ніводнага прыкладу эфектыўна праведзенай санацыі завода-банкрута. У лепшым выпадку падкінуць ільгот або перакрыюць кісларод кампаніям-канкурэнтам у відзе высокіх увазных пошлін, як гэта было, напрыклад, у выпадку з «Гомсельмашем» і гарадзенскай тытунёвай фабрыкай. Але гэта ж не выхад з становішча.
Акрамя таго, ніхто ў нашай краіне не ведае, колькі ж грошай ідзе на падтрымку неэфектыўнай вытворчасці ў прамысловай і сельскагаспадарчай сферах. І вось гэта гняце больш за ўсё. Таму што чалавек, які не ведае сваіх выдаткаў, урэшце, аказваецца без прыбыткаў.
Па словах эканаміста, на прадпрыемствы-банкруты і напаўбанкруты марнуецца не менш за 10 працэнтаў ВУП – гэта значыць, прыблізна 4 мільярды даляраў. «Вось і думайце, ці можа сабе гэта дазволіць у дадзены момант наша дзяржава» - падагульняе Яраслаў Раманчук.
