Каськіў: Цімашэнка адназначна зойме пасаду прэм'ер-міністра Украіны
- 4.10.2007, 12:19
Кандыдат у народныя дэпутаты ад блока Наша Украіна – Народная самаабарона, лідэр Грамадзянскай партыі Пора Уладзіслаў Каськіў упэўнены, што лідэр БЮТ Юлія Цімашэнка зойме пасаду прэм'ер-міністра Украіны.
Такое меркаванне ён выказаў падчас размовы з журналістамі, паведамляе Корреспондент.net.
"Юлія Цімашэнка адназначна зойме пасаду прэм'ер-міністра Украіны", – сказаў Каськіў.
Паводле яго слоў, на палітрадзе блока не будуць разглядацца іншыя кандыдатуры. Таксама ён паведаміў, што ў самыя блізкія дні адбудзецца сумесная палітрада НУ-НС і БЮТ.
Нагадаем, кандыдат у народныя дэпутаты ад партыі Наша Украіна Юры Паўленка ўчора, 3 кастрычніка, заявіў, што адкідае варыянт фармавання шырокай кааліцыі пры ўдзеле блока Наша Украіна–Народная самаабарона і Партыі рэгіёнаў.
Віктар Юшчанка адзначае, што тры ключавыя палітычныя сілы, якія па папярэднім падліку галасоў праходзяць у парламент, павінны знайсці разуменне вакол агульнанацыянальных прыярытэтаў і працаваць на дасягненне стабільнасці ў краіне.
Напярэдадні Прэзідэнт заклікаў Партыю рэгіёнаў, Блок Юліі Цімашэнкі, блок Наша Украіна–Народная Самаабарона, Камуністычную партыю і Блок Літвіна пачаць перамовы па фармаванні кааліцыі.
