Анатоль Лябедзька: «Меркаванні па маршруце Сацыяльнага маршу раздзяліліся»
7
8:52, — Палітыка
Аргкамітэт Сацыяльнага маршу большасцю галасоў прыняў рашэнне: 4 лістапада а 12 гадзіне пасля збору на пляцоўцы ля Акадэміі навук дэманстранты пройдуць на плошчу Бангалор, дзе адбудзецца мітынг. Такі фармат маршу, нагадаем, дазволены Менгарвыканкамам. Тым не менш, арганізатары акцыі маюць намер сустракаць удзельнікаў акцыі 4 лістапада а 12 гадзіне і на Кастрычніцкай плошчы Менска.
Як паведаміў прэс-цэнтру Хартыі’97 лідэр Аб'яднанай грамадзянскай партыі Анатоль Лябедзька, за правядзенне мітынгу на плошчы Бангалор выступілі кіраўнікі Партыі камуністаў беларускай Сяргей Калякін і Валеры Уханалёў, прафсаюзны лідэр Аляксандр Бухвостаў, частка актывістаў Беларускай сацыял-дэмакратычнай партыі (Грамада), у тым ліку генерал Валеры Фралоў.
Сам Анатоль Лябедзька заявіў, што на Бангалор не пойдзе. «Кансенсусу дасягнуць тут не атрымалася. Меркаванні па маршруце Сацыяльнага маршу раздзяліліся. Большасць вырашыла выконваць загад гарвыканкама, а гэта значыць ісці ад Акадэміі навук да Бангалор. Разам з гэтым, з разуменнем паставіліся да пазіцыі меншасці, той часткі аргкамітэта, якая лічыць неабходным прыйсці на Кастрычніцкую плошчу. Найперш, гэта моладзевыя арганізацыі, частка прадпрымальнікаў, актывісты розных палітычных партый і рухаў. Частка людзей прыйдзе на Кастрычніцкую плошчу і таму, што не паспеюць атрымаць іншую інфармацыю», – паведаміў лідэр АГП.
Сёння ж на пасяджэнні аргкамітэта быў прыняты зварот да беларусаў напярэдадні Сацыяльнага маршу, дзе тлумачацца мэты і маршрут акцыі. Прыняты таксама ў першым чытанні тэкст рэзалюцыі ўдзельнікаў Сацыяльнага маршу.
