Мікола Статкевіч: «З'езд правядзем ва ўсялякім выпадку»
17:38, — Палітыка
Беларуская сацыял-дэмакратычная партыя (Народная Грамада) не можа знайсці памяшканне для правядзення ўстаноўчага з'езду, які запланаваны на 17 лістапада. Пра гэта паведаміў АФН лідэр сацыял-дэмакратаў Мікола Статкевіч. Паводле яго слоў, куды б не звярталіся прадстаўнікі партыі, паўсюль атрымліваюць адмову ў арэндзе памяшкання.
«З'езд запланаваны на 17 лістапада, і сёння – апошні дзень (за 15 дзён па заканадаўстве) падаць заяўку на вызначанае памяшканне», – сказаў Статкевіч.
На ўсе пададзеныя заяўкі былі атрыманыя адмовы ў выдзяленні памяшкання.
«Мы шукаем памяшканне ўсюды. Нас усе баяцца, адмаўляюць. Яны ўсе літаральна жудасна палохаюцца, пачынаюць рукі, ногі трэсціся. А некаторыя пачынаюць казаць: ды вось разумееце, мы памыліліся, насамрэч усё занятае. І ўвогуле ў нас кожны дзень занятае і гэтак далей і гэтак далей», – распавёў Статкевіч.
Паводле яго, пагадзіўся даць памяшканне толькі Міжнародны адукацыйны цэнтр (IBB). Аднак саўладальнікам гэта цэнтра з'яўляецца Менгарвыканкам, у якога неабходна было атрымаць дазвол.
«Тыдзень гэты сузаснавальнік, нават больш, думаў, а сёння раніцай мне патэлефанавалі, і сказалі, што Менгарвыканкам забараніў даваць сацыял-дэмакратам памяшканне», – сказаў Статкевіч.
«Ну, вядома, хацелася б, каб з'езд прайшоў прыстойна, без усякіх там АМАПаў. Тым больш, што будуць прысутнічаць прадстаўнікі сацыял-дэмакратычнай партыі Нямеччыны. Хоць, калі і будзе гэтая клаунада, то хай госці ўбачаць, у якіх умовах мы працуем», – адзначыў Статкевіч.
Цяпер прынятае рашэнне ссунуць з'езд на адзін дзень – на 18 лістапада. Такім чынам, ёсць яшчэ два дні пашукаць памяшканне.
«З'езд правядзем ва ўсялякім выпадку. Калі нічога не знойдзем, а нас 200 дэлегатаў, ну што ж будзем праводзіць у маленькім памяшканні. Па паскоранай праграме, стоячы дзе-небудзь, напакаваўшыся як селядцы ў бочку. Можа, гасцям па крэсле дамо, а магчыма і пастаяць...– разважае Статкевіч. – Апошняя спроба сёння. Але далей, чым 18 лістапада, мы адсоўваць з'езд не будзем, таму што трэба перавыбраць сацыяльна-арганізацыйны камітэт, вызначыць стратэгію, тактыку і далей працаваць».
