Па ўсёй краіне пратэставалі 30 тысяч прадпрымальнікаў
7
15:02, — Палітыка
На думку лідэраў прадпрымальніцкага руху ў акцыі пратэсту 10 снежня па ўсёй краіне ўзялі ўдзел каля 30 тысяч чалавек. Пра гэта на прэс-канферэнцыі ў Менску заявілі Леў Марголін і Аляксандр Таўстыка.
Як паведаміў А.Таўстыка, 10 снежня было дасягнутае пагадненне ў тым, што лідэры прадпрымальніцкага руху правядуць кансультацыі з прадстаўнікамі ўрада і дэпутатамі «палаты прадстаўнікоў».
"Аднак, нягледзячы на тое, што старшыня камісіі «палаты прадстаўнікоў» Анатоль Паўловіч, які ў тым ліку займаецца і пытаннямі развіцця прадпрымальніцтва, заявіў, што ніякіх рэпрэсій у дачыненні арганізатараў акцыі не будзе, нашых людзей затрымалі. І я не выключаю, што 19 снежня – у дзень, калі прызначаныя перамовы, – проста няма каму будзе перагаворвацца. Усе нашы людзі будуць сядзець па турмах", – падкрэсліў Л.Марголін.
Нагадаем, у суд Цэнтральнага раёна сёння былі дастаўленыя восем затрыманых, у тым ліку лідэры прадпрымальніцкага руху Віктар Гарбачоў, Віктар Крываль, Віктар Калей і Аляксандр Цацура. Віктар Гарбачоў і Аляксандр Цацура ўжо прысуджаныя па фальшывых абвінавачваннях да 15 і 10 сутак адміністрацыйнага арышту. Працэс над яшчэ адным прадпрымальнікам, Аляксандрам Макаевым, праходзіў у судзе Маскоўскага раёна, яго прысудзілі да 7 сутак арышту.
На прэс-канферэнцыі Леў Марголін заклікаў падтрымаць ініцыятыву у тым, каб 1 студзеня пачаць страйк пратэсту.
Нагадаем, рашэнне аб пачатку з 1 студзеня 30-дзённага страйку індывідуальных прадпрымальнікаў было прынятае па выніках кансультацый паміж прадстаўнікамі ініцыятывы "За свабоднае развіццё прадпрымальніцтва" і рэспубліканскага кардынацыйнага савета прадпрымальнікаў, якія прайшлі ў Менску ўвечары 30 лістапада.
На думку Л.Марголіна, згодна з заканадаўствам прадпрымальнік мае права на 30-дзённы водпуск без выплаты падаткаў і аплаты арэндаванага месца. "Таму мы будзем прапаноўваць прадпрымальнікам напісаць заяву на водпуск і адпаведным чынам зарэгістраваць гэтую заяву ў органах выканаўчай улады", – сказаў Л.Марголін.
