«Газпром»: Танны газ толькі першыя тры месяцы
2- 22.12.2007, 8:26
Цана газу «Газпрома» для Беларусі, паводле кантрактнай формулы цаны, прывязанай да цэн на нафтапрадукты ў Еўропе, у 1-м квартале 2008 года складзе 119 даляраў.
Пра гэта гаворыцца ў паведамленні кампаніі па выніках сустрэчы старшыні праўлення "Газпрома" Аляксея Мілера і першага намесніка прэм'ер-міністра Рэспублікі Беларусь Уладзіміра Сямашкі.
На сустрэчы былі абмеркаваныя асноўныя пытанні двухбаковага супрацоўніцтва ў газавай сферы.
Бакі пацвердзілі ўзаемную прыхільнасць выкананню ўмоў кантракту паміж ААТ "Газпром" і ААТ "Белтрансгаз" ад 31 снежня 2006 г на пастаўку і транзіт газу ў 2007–2011 гады.
31 снежня 2006 года ААТ "Газпром" і ААТ "Белтрансгаз" падпісалі кантракт на пастаўку і транзіт газу ў 2007-2011 г. Дакументам была вызначаная цана расейскага газу пры пастаўках у 2007 годзе – 100 даляраў за 1 тыс куб. м і формула цаны з 1 студзеня 2008 г (адпаведная формуле цаны пры пастаўках расейскага газу ў Еўропу).
Дакументам таксама была ўзгодненая тарыфная стаўка пры пастаўках газу па сетках "Белтрансгаза" (1,45 дал) і плата за паслугі па ўпраўленні газаправодам "Ямал-Еўропа" (разлічваецца па формуле).
31 снежня 2006 г ААТ "Газпром" і ўрад Рэспублікі Беларусь падпісалі пратакол, згодна з якім ААТ "Газпром" набудзе 50% акцый ААТ "Белтрансгаз" за 2,5 млрд. даляраў роўнымі плацяжамі цягам чатырох гадоў.
У траўні 2007 года ААТ "Газпром" і дзяржаўны камітэт па маёмасці Рэспублікі Беларусь падпісалі дамову куплі-продажу акцый ААТ "Белтрансгаз". У чэрвені "Газпром" стаў уладальнікам 12,5 працэнтаў акцый ААТ "Белтрансгаз", пералічыўшы 625 млн. даляраў.
