Расея запусціла ракету з навігацыйнымі спадарожнікамі
8:20, — Палітыка
Ракета-носьбіт "Протон-М" з трыма навігацыйнымі спадарожнікамі "Гланасс-М" стартавала з касмадрома Байканур у Казахстане ў 22:32 па маскоўскім часе. Пра гэта паведамляе "Інтэрфакс" з спасылкай на службу інфармацыі і грамадскіх сувязяў Касмічных войскаў.
Пазней навігацыйныя спадарожнікі былі паспяхова выведзеныя на калязямную арбіту. Апараты разам з разгонным блокам аддзяліліся ад трэцяй ступені ракеты-носьбіта. Прыкладна праз 3,5 гадзіны дзякуючы рухавікам разгоннага блока ўсе тры спадарожнікі плануецца даставіць на мэтавую арбіту.
У службе інфармацыі адзначылі, што дастаўка трох "Гланасс-М" на мэтавыя арбіты вышынёй 19,1 тысяч кіламетраў з нахілам 64,8 градусу завершыцца прыкладна ў 2:00 па Маскве, то бок, у ноч на сераду.
Пасля выхаду на арбіту з кожным спадарожнікам пройдуць сеансы сувязі, а пасля іх чакае серыя цыклічных выпрабаванняў па адпрацоўцы сістэмы кіравання, атрымання і перадачы сігналу. На гэтую працу можа запатрабавацца некалькі месяцаў.
Нагадаем, мэтай запуску з'яўляецца папаўненне арбітальнай групоўкі расейскай касмічнай навігацыйнай сістэмы ГЛАНАСС. Папярэдні запуск трох навігацыйных спадарожнікаў "Гланасс-М" быў ажыццёўлены 26 кастрычніка.
Касмічныя апараты "Гланасс-М" створаныя НВА прыкладнай механікі (Жэлезнагорск, Краснаярскі край). Яны адрозніваюцца ад спадарожнікаў папярэдняга пакалення "Гланасс" павялічаным з трох да сямі гадоў тэрмінам актыўнага існавання, а таксама падвышанай у 2,5 разы дакладнасцю навігацыйнага вызначэння дадзеных і іншымі ўдасканаленымі характарыстыкамі.
Гэта ўжо 23-і касмічны запуск, ажыццёўлены Расеяй у 2007 годзе, у тым ліку 19-ы выкананы з Байканура. Адзін з запускаў быў аварыйным – у верасні ракета "Протон-М", якая стартавала з Байканура, упала на 3-ай хвіліне палёту, быў страчаны японскі спадарожнік. У 2006 годзе Расея ажыццявіла 25 касмічных запускаў.
Глабальная навігацыйная спадарожнікавая сістэма ГЛАНАСС – "наш адказ" амерыканскай сістэме GPS, выкарыстоўваецца для забеспячэння навігацыйнай інфармацыяй і сігналамі дакладнага часу наземных, марскіх, авіяцыйных і касмічных спажыўцоў.
