Прадпрымальнікі не выйшлі на рынкі
38
8:59, — Палітыка
Нягледзячы на звычайны рэжым працы, 2 студзеня больш як 90% прадпрымальнікаў не адкрылі свае гандлёвыя кропкі. У Менску на рынках у Ждановічах, Малінаўцы, "Экспобеле" працавалі толькі адзінкі. Такая сітуацыя назіралася па ўсёй рэспубліцы. Такім чынам прадпрымальнікі страйкуюць супраць указу № 760.
Страйк супраць указу, які забараняе выкарыстоўваць працу наёмных працаўнікоў, за выключэннем блізкіх сваякоў, быў абвешчаны з 1 студзеня. Аднак толькі пасля святаў стала відавочна, што прадпрымальнікі наладжаныя рашуча.
Як паведаміў "Салідарнасці" кіраўнік Менскай рады прадпрымальнікаў Аляксандр Макаеў, 2 студзеня 90-95% гандлёвых кропак усіх сталічных рынкаў не працавалі.
– Магчыма, яшчэ рана казаць пра тое, што ўсе гэтыя прадпрымальнікі падтрымалі страйк, – адзначае Макаеў. – Канчаткова сітуацыя вызначыцца толькі праз некалькі дзён. Аднак ужо сёння вядома, што з 1200 працоўных месцаў на будаўнічым рынку “Ждановічы” не аплачаная арэнда на наступны год за 200 месцаў, у гандлёвым цэнтры “Зеркало” такіх 25%, а ў г/ц “Еўропа” вызваліўся цэлы паверх.
2 студзеня ў Магілёве так і не пачалі сваю працу адразу некалькі гандлёвых выстаў. Як распавёў лідэр РГА "Перспектыва" Анатоль Шумчанка, раніцай магілёўскія прадпрымальнікі правялі сход, на якім пастанавілі 3 студзеня выйсці на цэнтральную плошчу і патрабаваць сустрэчу з уладамі для вырашэння ўзніклай праблемы.
– Улады дамагліся таго, чаго і дамагаліся. Рынкі зачыненыя, прадпрымальнікі не працуюць, – адзначае Шумчанка. – Але мы не маем намеру сядзець склаўшы рукі і будзем працягваць змагацца. Пасля нядаўніх выказванняў прэзідэнта прадпрымальнікі настроеныя яшчэ больш рашуча.
Нагадаем, 30 снежня падчас наведвання "SOS-Дзіцячай вёскі" ў Бараўлянах Лукашэнка падвергнуў рэзкай крытыцы дзейнасць індывідуальных прадпрымальнікаў.
– Шмат хто праз гэтых індывідуальных прадпрымальнікаў, якія маюць ільготы, пачалі завозіць тавары для сябе. З'явілася крымінальны асяродак, – заявіў Лукашэнка.
Ён таксама падкрэсліў, што, прыняўшы ўказ №760, дзяржава як раз "дала аддуху" прадпрымальнікамі.
– Добра, некаторы час будзьце "індывідуаламі", наймайце сваякоў і працуйце па льготах. Не падабаецца? Праз год будзеце працаваць у роўных умовах. Адступленне я зрабіў учора, падпісаўшы ўказ аб падаўжэнні да 1 сакавіка 2008 года тэрмінаў перарэгістрацыі ІП у ПУП па спрошчанай схеме. А пасля – як усе, – заявіў тады Лукашэнка.
Між іншым, прадпрымальнікі такую "аддуху" ўспрымаюць выключна як спробу цалкам задушыць малы бізнэс.
– Менавіта цяпер мы павінны прадэманстраваць сваю згуртаванасць, – лічыць Аляксандр Макаеў. – Таму як, калі ўлада ўбачыць, што прадпрымальнікі не згуртаваныя, яна і надалей будзе працягваць дзейнічаць з намі такімі метадамі.
Плануецца, што страйк падоўжыцца да 15 студзеня. 10 студзеня прадпрымальнікі маюць намер выйсці на Кастрычніцкую плошчу. У сваю чаргу, грамадскае аб'яднанне "Перспектыва" ў другой палове студзеня мае намер правесці "марш прадпрымальнікаў".
Напісаць каментар (38)
