«Рэпарцёры без межаў» заклікалі беларускія ўлады не кантраляваць інтэрнэт

Міжнародная праваабарончая арганізацыя «Рэпарцёры без межаў» заклікала беларускія ўлады «утрымацца ад спакусы ўзмацніць кантроль за Інтэрнэтам».

Як перадае БелаПАН, у паведамленні для прэсы «Рэпарцёры без межаў» адзначаюць, што «рашэнні, прынятыя ў найбліжэйшай будучыні, будуць мець важнае значэнне і будуць разглядацца як сігналы аб рэальных намерах уладаў».

Праваабаронцы віталі рашэнне беларускіх уладаў аднавіць друк і распаўсюд двух незалежных газетаў — «Народнай Волі» і «Нашай Нівы». Яны заклікалі кіраўніцтва Беларусі распачаць падобныя крокі ў дачыненні да дзясяткаў іншых газетаў, а таксама вырашыць пытанне акрэдытацыі замежных журналістаў.

Як паведамлялася раней, 25 лістапада «Народная воля» заключыла дамовы з «Белсаюздрукам» і «Белпоштай» на распаўсюд выдання праз рознічную сетку кіёскаў і па падпісцы. 27 лістапада газета паступіла ў продаж. «Наша Ніва» пакуль падпісала дамову на распаўсюд толькі з «Белпоштай».

24 лістапада на паседжанні круглага стала па пытаннях развіцця інтэрнэт-СМІ памочнік прэзідэнта Беларусі па ідэалогіі Усевалад Янчэўскі заявіў, што інтэрнэт у Беларусі нібыта «быў, ёсць і будзе свабодным».