Прэмію імя Юрыя Захаранкі ўручаць Міколе Аўтуховічу
15:44, — Палітыка
Лаўрэатам прэміі імя былога міністра ўнутраных спраў Беларусі Юрыя Захаранкі "З адкрытым забралам" па выніках 2007 года стаў прадпрымальнік Мікола Аўтуховіч.
Нагадаем, прэмія ўручаецца штогод дэмакратычным рухам, які аб’яднае афіцэраў – былых супрацоўнікаў праваахоўных органаў і іншых сілавых структур Беларусі.
Як паведаміла на цырымоніі ў Менску 21 лютага юрыст Раіса Міхайлоўская, прэмія ўручаецца "мужным людзям, якія абараняюць гонар нашай Радзімы". "Гэтая прэмія ўручаецца тым, хто ўнёс найбольшы ўклад у абарону правоў чалавека, хто змагаецца з дыктатурай, нават седзячы ў турме", – заявіла Р.Міхайлоўская.
Ветэран вайны ў Афганістане, праваабаронца Алег Воўчак адзначыў, што "было шмат кандыдатур на гэтую прэмію". "Сярод іх – прадпрымальнікі Віктар Гарбачоў і Аляксандр Камароўскі, якія не пабаяліся адстойваць сваё права на ўласную справу і сталі лідэрамі прадпрымальніцкага руху", – сказаў праваабаронца.
"Мне прыемна, што на пярэднім краі барацьбы за свае правы апынуліся былыя ваяры-афганцы – Мікола Аўтуховіч і Аляксандр Камароўскі. Асабліва важна тое, што, змагаючыся за свае правы, яны заўсёды заклікалі да вызвалення палітычных зняволеных, – найперш, Аляксандра Казуліна. Але Мікола Аўтуховіч апынуўся на пярэднім краі барацьбы прадпрымальнікаў. Ён з 1994 года абараняў свой бізнэс, ён не даваў хабараў, ні перад кім не кланяўся дзеля таго, каб яго бізнэс ніхто не чапаў", – заявіў А.Воўчак. Паводле яго слоў, "гэты чалавек умее спалучаць такія якасці, як дабрыня і жорсткасць, прыстойнасць і клопат аб людзях". "Яго імя ведае шмат хто, таму што ён праводзіў шмат дабрачынных мерапрыемстваў. Яго прадпрыемства шмат каму дало працу ў Ваўкавыску. Знаходзячыся ў турме, ён не раз аб'яўляў галадоўкі, адна з якіх працягвалася 74 дні. Такой працягласці галадоўкі пратэсту найноўшая гісторыя Беларусі, ды і іншых краін, яшчэ не ведала", –адзначыў А.Воўчак.
"Я хацеў бы падзякаваць усім, хто падтрымліваў мяне падчас зняволення. Толькі дзякуючы грамадскай увазе, грамадскаму кантролю на свабоду цяпер выходзяць палітычныя зняволеныя. Але я хачу нагадаць: у турмах яшчэ знаходзяцца не толькі "палітычныя", але і тыя людзі, якія знаходзяцца там па цалкам надуманых прычынах. Але яны баяцца пісаць адкрытыя лісты, заявіць адкрыта пра свае справы. І я спадзяюся, што на маім прыкладзе людзі ўбачаць, што калі варушыцца – можна нешта змяніць. І таму я буду цяпер супрацоўнічаць з усімі, хто дапамагае такім зняволеным", – заявіў М.Аўтуховіч.
Нагадаем, у розныя гады лаўрэатамі прэміі імя Захаранкі быў палітык, генерал Валеры Фралоў, праваабаронца Гары Паганяйла, экс-кандыдат у прэзідэнты, лідэр Беларускай сацыял-дэмакратычнай партыі (Грамада) Аляксандр Казулін.
