Лукашэнка падарыў 70-гадовай пенсіянерцы трэці матацыкл
8
11:13, — Грамадства
Пенсіянерка Тамара Давідовіч даўно марыла пра новы матацыкл. У ролі джына-выканаўца жаданняў выступіў Аляксандр Лукашэнка.
Як паведамляе «Советская Белоруссия», Тамара Давідовіч з'яўляецца заядлай матацыклісткай з стажам больш як 40 гадоў. Сама бабуля сцвярджае, што за ўвесь гэты час ні воднага разу не парушыла правілы дарожнага руху і «нават камара ніводнага не задавіла».
Да апошняга часу ў гаспадарцы ў пенсіянеркі меўся старэнькі ІЖ. Але ў лютым яна распавяла пра сваю мару – новы матацыкл – друкаванаму органу прэзідэнцкай адміністрацыі. І – вось цуд! – неўзабаве ў вёску прыбыў падарунак ад Аляксандра Лукашэнкі – новенькі «ІЖ–Планета–5», адзначае «Салідарнасць».
Зрэшты, спяшаемся супакоіць тых, хто паспешліва вырашыў, што такім чынам першы сустрэчны можа выпытаць у кіраўніка дзяржавы што-небудзь патрэбнае ў гаспадарцы. Наўрад ці гэты прыём спрацуе. Калі, вядома, вы не з'яўляецеся, як вышэйзгаданая пенсіянерка, жыхаром вёскі Гарадзец Шклоўскага раёна і пераможцам сацыялістычных спаборніцтваў.
Як высветлілася, Тамара Давідовіч ужо атрымала пры дапамозе Аляксандра Лукашэнкі адзін матацыкл – у канцы 80-х. Так яе аддзячылі за працоўныя подзвігі. «За гэта я Аляксандру Рыгоравічу Лукашэнку вельмі ўдзячная, ён жа тады ў нас дырэктарам саўгаса працаваў», – прызналася бабуля-матацыклістка.
Самае цікавае, што нядаўна на тэлевізійным ток-шоу «Ответный ход» Тамары Давідовіч уручылі сертыфікат ад кіраўніцтва прадпрыемства «Мотавела» на атрыманне матацыкла «Менск класік». Але Аляксандр Лукашэнка вырашыў, што без яго свята не атрымаецца. Цяпер, калі «Мотавела» стрымае сваё абяцанне, неўзабаве ў пенсіянеркі будзе цэлы мотапарк – стары ІЖ, новы ІЖ і «Менск класік».
