Расейскія СМІ: «Найманне Бэла абыдзецца Беларусі ў дзесяткі мільёнаў даляраў»

Аляксандр Лукашэнка вырашыў выправіць сабе рэпутацыю. Для гэтага ён наняў Тымаці Бэла, брытанскага ветэрана палітычнага піару, які працаваў, паводле дадзеных газеты The Guardian, з Маргарэт Тэтчер, генералам Аўгуста Піначэтам, Барысам Ельцыным і эмігрантам Барысам Беразоўскім, піша расейская газета «Ведомости».

66-гадовы сябар палаты лордаў брытанскага парламента Тымаці Бэл заявіў газеце Moscow Times, што Лукашэнка «хоча, каб яго краіну і яго поспехі ўспрымалі ў лепшым святле». За дзень да гэтага ён абмеркаваў з кіраўніком Беларусі ў Менску спосабы падвышэння прэстыжу краіны на Захадзе. Пра сустрэчу паведамляе сайт беларускага прэзідэнта.

У 2005 годзе дзяржсакратар ЗША Кандаліза Райс назвала Беларусь «фарпостам тыраніі». Праваабарончыя арганізацыі, сярод іх Human Rights Watch, абвінавачваюць Лукашэнку ў стварэнні дыктатарскага рэжыму па савецкім узоры.

Па словах Бэла, Лукашэнка заяўляе, што «не бачыць прычын, чаму Беларусь не можа адначасова сябраваць і з Захадам, і з Расеяй».

Пасля спынення льготных паставак расейскага газу беларуская эканоміка нясе страты, і Лукашэнка пачаў рабіць пэўныя крокі, каб змякчыць ізаляцыю краіны. На сустрэчы з брытанскімі дыпламатамі ён выказаў здагадку, што Вялікабрытанія можа ў хуткім часе стаць найбуйнейшым інвестарам Беларусі. Раней, на пачатку сакавіка, быў скасаваны прынцып «залатой акцыі», які замінаў прыватызацыі беларускіх прадпрыемстваў. Вызваленыя некалькі беларускіх апазіцыянераў. Нарэшце, у Менску адкрыўся офіс Еўракамісіі.

Дырэктар міжнароднага інстытута палітычнай экспертызы Яўген Мінчанка, мяркуе, што разам з коштам размяшчэння матэрыялаў у прэсе найманне Бэла абыдзецца Беларусі ў некалькі дзесяткаў мільёнаў даляраў.