Рэжым Лукашэнкі дапаможа Венесуэле стварыць сістэму СПА

Беларусь цягам 6 гадоў створыць у Венесуэле сістэму супрацьпаветранай абароны і радыёэлектроннай барацьбы, заявіў у Менску намеснік начальніка Генеральнага штаба ўзброеных сілаў Беларусі Пётр Ціханоўскі пры абмеркаванні ў парламенце ратыфікацыі адпаведнага пагаднення.

"Мяркуецца цягам 6 гадоў паставіць Венесуэле сістэму СПА, уключна падрыхтоўку спецыялістаў і падрыхтоўку кіруючага складу", – сказаў П.Ціханоўскі.

Згодна з ацэнкай П.Ціханоўскага, у Венесуэле цяпер "няма сістэмы СПА, ёсць разрозненыя падраздзяленні, знішчальная авіяцыя, але сістэмы СПА няма". Намеснік начальніка Генштаба лічыць, што стварэнне сістэмы СПА ў Венесуэле дазволіць Беларусі заняць рынкі ўзбраення ў Лацінскай Амерыцы. Паводле яго слоў, мяркуецца выкарыстаць розныя выгляды ўзбраенняў, "125-ы комплекс і іншыя, якія будуць пастаўляцца ў Венесуэлу па кантрактах упаўнаважаных органаў".

СПА Венесуэлы прадстаўлена, пераважна, французскай і амерыканскай тэхнікай, "аднак цяпер яны прынялі рашэнне арыентавацца на Усход: Расею, Кітай", адзначыў П.Ціханоўскі.

Гаворачы пра эканамічны эфект рэалізацыі дадзенага пагаднення, П.Ціханоўскі адзначыў, што беларускі бок разлічвае на эканамічны эфект не толькі ў ваенна-тэхнічнай сферы. "Гэта дазволіць больш актыўна развіваць і нашы іншыя інтарэсы ў Венесуэле", – сказаў П.Ціханоўскі.

Намеснік начальніка Генштаба таксама адзначыў, што стварэнне сістэмы СПА ў Венесуэле неабходна для "нармальнага развіцця і машынабудавання, і нафтаздабычы". "Без ваеннага складальніка гэта немагчыма", – дадаў ён.

П.Ціханоўскі таксама паведаміў, што ўжо сёлета Беларусь накіруе ў Венесуэлу больш як 10 вайсковых дарадцаў, пасля колькасць вайсковых спецыялістаў будзе павялічвацца.