Юры Шаўчук: «Калі ў мастака накіпіць, ён ідзе і пратэстуе»
8- 5.03.2008, 10:41
Расейскі рок-музыка, лідэр гурту ДДТ Юры Шаўчук растлумачыў, чаму ён удзельнічаў у пецярбургскім "Маршы нязгодных", які прайшоў 3 сакавіка. "Калі ў мастака (а я лічу сябе мастаком) накіпіць, ён ідзе і пратэстуе", – заявіў Шаўчук.
Як адзначае агенцтва "Новы рэгіён", якое публікуе інтэрв'ю з музыкам, расейская апазіцыя была прыемна здзіўленая ўдзелам Шаўчука ў "Маршы". Як паведаміў актывіст піцерскай забароненай арганізацыі НБП Андрэй Дзмітрыеў, вядомы рок-музыка прыйшоў на акцыю сам, без папярэдніх дамоўленасцяў.
Лідэр ДДТ пацвердзіў, што загадзя не ўзгадняў з аргкамітэтам "Маршу" свой удзел у акцыі, адзначыўшы пры гэтым, што не баіцца рэпрэсій з боку дзяржорганаў.
Шаўчук гаворыць, што яго не задаволіла правядзенне прэзідэнцкіх выбараў – яны былі не дэмакратычнымі. "Сёння "пераемнасць" у Расеі азначае манархію, а не дэмакратыю, пра якую ўсе гавораць. Тады хай улады скажуць, што ў нас у краіне манархія. Манархія, так манархія, але не пудрыце народу мазгі", – заяўляе музыка.
Ён таксама распавёў пра свае ўражанні: яму вельмі спадабаліся людзі. "У іх сапраўды душа баліць за краіну, як і ў мяне. Акрамя таго, я ў жаху ад таго, што адбываецца з Санкт-Пецярбургам. Санкт-Пецярбург – гэта жамчужына свету, я шмат паматаўся, мне ёсць, з чым параўнаць. Але на Неўскім праспекце шэсць дамоў былі знішчаныя. Горад блакаду перажыў. Фашысты яго менш зруйнавалі, чым цяперашнія службоўцы і бізнэсмэны", – гаворыць Шаўчук.
Лідэраў "Другой России" – Гары Каспарава і Эдуарда Лімонава – Шаўчук назваў шчырымі і сумленнымі людзьмі. "Яны не сядзяць у кустах, проста заяўляюць пра сваю пазіцыю. Гэта мне вельмі падабаецца. Таму, нягледзячы на некаторую рознасць у нашых поглядах, я іх вельмі паважаю", – заявіў Шаўчук. Як лічыць музыка, менавіта гэта і ёсць дэмакратыя: гавары, але пры гэтым давай выказацца свайму апаненту.