«Вольны горад» супраць «Ленінскага кліча»
- 7.03.2008, 9:28
Чавускі раённы суд прыпыніў разгляд грамадзянскай справы супраць крычаўскай раённай газеты «Ленинский клич» да атрымання вынікаў лінгвістычнай эспертызы.
Адвакатка з боку зыскоўцаў Кацярына Маліноўская заявіла хадайніцтва аб прызначэнні лінгвістычнай эспертызы тэксту, што стаў нагодай для зыску. Экспертыза закліканая высветліць, ці ўтрымліваюць тэксты бяздоказныя негатыўныя характарыстыкі зыскоўцаў, і ці магчыма правесці аналогію паміж пэрсанажамі публікацый і заяўнікамі прэтэнзій.
Суддзя Алена Каролька вырашыла задаволіць хадайніцтва і прыпыніць вытворчасць па справе да атрымання вынікаў эксперызы.
У канцы лістапада 2007 г. Сяргей Няроўны і заснавальнік гэтага выданьня Уладзімір Кудраўцаў падалі зыск да рэдакцыі газеты «Ленинский клич» аб абароне гонару, годнасці, дзелавой рэпутацыі і кампенсацыі маральных стратаў на суму 10 млн. рублёў. Зыск тычыцца некалькіх сатырычных публікацый у дзяржаўнай «раёнцы».
Першапачаткова слуханні па зыску распачаліся ў судзе суседняга Чавускага раёна — нібыта з прычыны вялікай загружанасці крычаўскіх суддзяў. Але па просьбе С. Няроўнага Магілёўскі абласны суд перанёс разгляд справы ў Крычаў — па месцы прапіскі зыскоўцы і адказчыка.
Першае судовае паседжанне па зыску адбылося 17 студзеня, аднак слуханні перанеслі з-за адсутнасці галоўнай адказчыцы — рэдактаркі «Ленинского клича» Таццяны Іўкінай.
3 сакавіка слуханні аднавіліся. Суд устанавіў, што гумарэскі пісалі рэдактарка газеты Тацяна Іўкіна, яе намеснік Уладзімер Далецкі, а таксама карэспандэнты выдання Аляксандар Гаўрыленка ды Аляксей Іваноў.
