Сусветна вядомыя дзеячы патрабуюць вызвалення Аляксандра Казуліна
8
12:55, — Палітыка
У Польшчы, Францыі і Галандыі прайшла сумесная акцыя ініцыятывы «Wolna Bialor» і «Amnesty International» за вызваленне палітвязня Аляксандра Казуліна.
Сутнасць акцыі зводзілася да напісання лістоў Аляксандру Лукашэнкі з патрабаваннем вызвалення палітвязня. Зварот напісалі сусветна вядомыя грамадскія дзеячы. Збігнеў Бжэзінскі, Адам Міхнік, Андрэ Глюксман, Сяргей Кавалёў, Міраслаў Марыновіч, Марэк Эдэльман і іншыя.
Было напісанае больш як 400 лістоў, якія неўзабаве адправяцца поштай непасрэдна Аляксандру Лукашэнку. Толькі з інтэрнэт-партала www.wolnabialorus.pl былі накіраваныя больш як 500 электронных лістоў.
Гэтую ініцыятыву падтрымалі шмат простых людзей, якія ахвотна пісалі лісты і прыцягвалі да акцыі сваіх дзяцей і сяброў. Працэс збору подпісаў у падтрымку Казуліна стаў адным з сюжэтаў праграмы «Panorama» 2 канала польскага тэлебачання, а таксама знайшоў адлюстраванне ў матэрыялах вядучых польскіх газет, такіх як «Gazeta Wyborcza» і «Rzeczpospolita». Адначасова акцыю падтрымаў лідэр руху «За Свабоду» Аляксандр Мілінкевіч.
Тэкст звароту да Аляксандра Лукашэнкі:
Спадар Прэзідэнт,
Ваш палітычны супернік Аляксандар Казулін ужо два гады як знаходзіцца ў турме. Ён быў жорстка пакараны за выступ супраць парушэння дэмакратычных стандартаў, якія мелі месца падчас прэзідэнцкіх выбараў 2006 г. Сусветная супольнасць лічыць Аляксандра Казуліна Вязнем сумлення і ахвярай дзяржавы, якая катуе сваіх грамадзян.
Адмысловую занепакоенасць і абурэнне выклікаюць Вашы паводзіны ў сітуацыі з сямейнай трагедыяй Аляксандра Казуліна: нядаўна, пасля працяглай хваробы, памерла яго жонка Ірына Казуліна.
Смерць блізкага чалавека – гэта страшная трагедыя, якая не павінна станавіцца аб'ектам палітычных працэсаў, шантажу або спроб псіхалагічнага ціску на чалавека, які знаходзіцца ў такой цяжкай сітуацыі. Спробы ігнараваць гэты факт мы разглядаем як замах на чалавечую годнасць.
Спадар Прэзідэнт, існуе толькі адзін спосаб, хаця б часткова кампенсаваць вялізныя страты Аляксандра Казуліна, нанесеныя Вашым кіраўніцтвам – неадкладна вызваліць яго з турмы і ўстрымацца ад далейшага пераследу і рэпрэсій; так, каб Казулін здолеў, як свабодны грамадзянін, развітацца па-людску з жонкай і вярнуцца да нармальнага жыцця ў грамадстве.
Мы патрабуем неадкладнага вызвалення Аляксандра Казуліна і спадзяемся на вашу спагадлівасць!
