Пасля арышту дырэктара «Ждановічаў» беларускі тэнісны стол збяднеў
13:05, — Крымінал
Арыштаваны бізнэсмэн Яўген Шыгалаў быў не толькі старшынём савету дырэктараў гандлёвага дому «Ждановічы» і адным з лідэраў «Белай Русі», але і намеснікам старшыні Беларускай тэніснай асацыяцыі, якую ўзначальвае кіраўнік сталічнай выканаўчай улады Міхаіл Паўлаў.
У сувязі з гэтым анансаванае на 10 красавіка лёсаванне матчу Кубку Дэвіса Беларусь - Швейцарыя выклікала падвышаную цікавасць, піша «Салідарнасць».
Найбольш бачныя змены адбыліся на фуршэце. Звычайна сталы ламіліся ад страваў, цяпер жа было хоць і са смакам, але куды больш сціпла. Напрыклад, рэзка скараціўся асартымент слодычаў. Магчыма, рэальная прычына ў тым, што цяпер Беларусь гуляе не ў Сусветнай, а ўсяго толькі ў першай групе Еўра-Афрыканскай зоны, але пасля гучнага арышту Шыгалава кожная дэталь сімвалічная.
Як, напрыклад, і суцэльнае маўчанне Паўлава на цырымоніі лёсавання. Звычайна ён выступае з вітальнай прамовай, а тут усю цырымонію прасядзеў з непранікнёным тварам. Па сканчэнні лёсавання асобныя журналісты спрабавалі перахапіць “граданачальніка», але той з ходу пераадрасаваў іх да прэсавай службы.
У дадатак, у ратушы, дзе адбывалася імпрэза, адсутнічаў і абвешчаны міністр спорту Аляксандр Грыгораў. Хаця, магчыма, пасля паездкі ў В’етнам ён проста дагульвае адпачынак, а замены ў міністэрстве не знайшлося.
Уласна лёсаванне матчу, які адбудзецца 11 – 13 красавіка, адзначылася сенсацыяй: другім нумарам у беларусаў будзе не Уладзімір Ваўчкоў, а зусім малады Уладзімір Ігнацік. Капітан каманды гаспадароў Зміцер Татур заявіў, што гэта замена нечаканая: «Ад пачатку мы планавалі першыя два дні гуляць выпрабаваным складам – Мірны і Ваўчкоў, але давялося ладзіць замену. Падрабязнасці па ясных прычынах агучваць не буду.»
Магчыма, гэта тактычны крок, каб паберагчы сілы Ваўчкова на нядзелю, паколькі ў пятніцу лідэр швейцарцаў Станіслаў Ваўрынка амаль дакладна выйграе ў любога з беларусаў, і няхай ужо гарматным мясам стане 17-гадовы Ігнацік, чым 30-гадовы Ваўчкоў.
