Сьмех скрозь сьлёзы

Актывісты “Маладога Фронта” прымецілі самыя яскравыя выразы, думкі і ідэі, якія былі выказаны супрацоўнікамі Магілёўскага СОБРа падчас судоў над удзельнікамі акцыі 25 сакавіка 2008 года. Міліцыянты выступалі ў якасьці сьведак.

Міліцыянт Сяргеяў, 1976 г.р.

Адвакат: Як Вы вызначылі, што гэта было шэсьце?

Сяргеяў: Людзі ідуць насустрач. Натоўп. Шмат людзей.

Адвакат: Так што, людзі па горадзе ня могуць проста ісьці, у іх няма права на гэта?

Сяргеяў: Так у іх хусткі завязаныя. Навошта хаваць твар? Трэба спыніць.

Міліцыянт Раўцкі, 1986 г.р.

Адвакат: А Вы ведалі, што за акцыя ў Менску, якое сьвята людзі адзначаюць?

Раўцкі: Нейкая акцыя. Я ня ведаю. Паклікаў камандзір для адпрацоўкі.

Адвакат: Што Вы павінны былі рабіць?

Раўцкі: Аб'ект - наша задача.

Адвакат: А як Вы вызначаеце свой "аб'ект"?

Раўцкі: Арнамент. Павязка

Міліцыянт Рыбакоў, 1975 г.р.

Актывіст Маладога Фронту: А куды ж, у які бок мы ішлі? Вы павінны гэта ведаць, бо Вы кажаце, што мы з Вамі стаялі твар у твар?

Рыбакоў (крычыць ва ўвесь голас) : Які твар? Які твар? У мяне “ліцо”, а ня твар! Ня ведаю я ніякага твара.

Міліцыянт Таранаў:

Адвакат: Якія лозунгі забароненыя крычалі?

Таранаў: Ганьба! Жыве Беларусь! Свабоду Мілінкевічу!

Адвакат: Мілінкевіч на волі.

Таранаў: Ня ведаю…

Міліцыянт Сотнікаў, 1980 г.р.

Адвакат: Ну вось Вы гаворыце, што вось гэтая жанчына (1951 г.р.) ішла на вас, паводзіла сябе задзірліва, крычала, сьцяжком махала, менавіта яна з тысячнага натоўпу прыцягнула Вашу ўвагу. Як Вы яе затрымоўвалі?

Сотнікаў: Падышлі, вельмі ветліва папрасілі яе прайсьці з намі да аўтазака.

Адвакат: Ну і што яна не абуралася, не супрацівілася?

Сотников: Ды не. Яна пагадзілася.

Міліцыянт Новікаў, 1985 г.р.

Адвакат: Вы гаворыце, што сьцягі ўбачылі. А якія сьцягі, якога колеру?

Новікаў: Бела-блакітныя. Белыя!

Адвакат: Якія фразы выкрыквала гэтая жанчына (1951 г.р.)?

Новікаў: Выкрыквала “антиполитические” фразы. Прымушала грамадзян прайсці да пл. Я. Коласа.

Адвакат: Прымушала? Якім чынам? За рукавы цягнула або як?

Новікаў: Не. Выкрыквала.