Аляксандр Мілінкевіч: «Мы ўсё вырашым на паседжанні аргкамітэту»
10
16:29, — Палітыка
Сёння ў Менгарвыканкаме адбылася сустрэча заяўнікаў «Чарнобыльскага шляху» з прадстаўнікамі ўладаў наконт правядзення акцыі 26 красавіка, прымеркаванай да гадавіны аварыі на ЧАЭС.
У Менгарвыканкаме сустрэліся некаторыя заяўнікі «Чарнобыльскага шляху» Аляксандр Ваўчанін, Уладзімір Лабковіч, Ігар Рынкевіч, Алег Шапавалаў, Юрый Мілішкевіч і намеснік пракурора Менску Аляксей Стук, намеснік старшыні Менгарвыканкама па ідэалогіі Генадзь Курбека, намеснік старшыні Менгарвыканкама па грамадскай бяспецы палкоўнік Іван Мельнік.
Як паведаміў прэс-цэнтру Хартыі’97 юрыст Ігар Рынкевіч, які прысутнічаў на сустрэчы ў Менгарвыканкаме, заяўнікам «Чарнобыльскага шляху» было зачытанае рашэнне, датычнае акцыі. Удзельнікам «Чарнобыльскага шляху» прапанавалі сабрацца з 14.00 да 15.00 на пляцоўцы перад будынкам прэзідыўма Акадэміі навук. Затым дазволена шэсце па ходніках праспекта Незалежнасці, вуліцы Сурганава ў парк Дружбы народаў, дзе прапаноўваецца правесці мітынг.
«Улады прапанавалі класічны бескампрамісны варыянт правядзення акцыі. Іншага ў іх, відавочна, няма. Мы хацелі абмеркаваць маршрут «Чарнобыльскага шляху», але нам сказалі, што рашэнне канчатковае і падпісана намеснікам старшыні Менгарвыканкама Міхаілам Ціцянковым», -- паведаміў прэс-цэнтру Хартыі’97 Рынкевіч.
Пракаментаваць сітуацыю прэс-цэнтр Хартыі’97 таксама прапанаваў кіраўніку аргкамітэту «Чарнобыльскага шляху», лідэру руху «За свабоду» Аляксандру Мілінкевічу.
«Ніякай нечаканасці ў рашэнні ўладаў няма. Яны з дакучлівай настойлівасцю прапаноўваюць маршрут на Бангалор, але даўно вядома, што большасць дэмакратычна настроеных людзей хочуць праводзіць акцыі ў цэнтры Менску. Горад належыць ўсім, і мы даказалі, што можам праводзіць мірныя акцыі. Сёння пройдзе паседжанне аргкамітэту, і мы ўсё вырашым наконт фармату правядзення «Чарнобыльскага шляху», -- сказаў Аляксандр Мілінкевіч.
Нагадаем, што дэмакраты мусілі пачаць «Чарнобыльскі шлях» 26 красавіка ў 14.00 на пляцоўцы каля Акадэміі навук і працягнуць яго шэсцем да плошчы Незалежнасці, дзе павінен быў прайсці мітынг.
Напісаць каментар (10)
