Амбасада ЗША: «Андрэй Кім з’яўляецца палітычным вязнем»
6
17:53, — Палітыка
Часовы павераны ў справах ЗША ў Беларусі Джонатан Мур так пракаментаваў прысуд, вынесены 22 красавіка моладзеваму актывісту: "Прысуд Андрэю Кіму— гэта палітычнае рашэнне.
Нагадаем, суд Цэнтральнага раёну Менску прызнаў А. Кіма вінаватым па артыкуле 364 Крымінальнага кодэкса (гвалт ці пагроза гвалту ў адносінах супрацоўніка міліцыі). Моладзевы актывіст асуджаны на паўтары гады пазбаўлення волі ў калоніі агульнага рэжыму.
"Відавочная выснова — Андрэй Кім з’яўляецца палітычным вязнем", — заявіў амерыканскі дыпламат. Ён падкрэсліў, што "ЗША заклікалі і будуць заклікаць беларускі рэжым вызваліць усіх палітычных вязняў". "На дадзены момант гэта Аляксандр Казулін і Андрэй Кім", — сказаў Джонатан Мур агенству БелаПАН.
